حکومت نے یکم نومبر کوعام تعطیل کا اعلان کرد یا ، مگر کیوں؟

نارووال: صوبائی کی جانب سے یکم نومبر کو ضلع نارووال میں عام تعطیل کا اعلان کر دیا۔

اس حوالے سے ڈپٹی کمشنر سید حسن رضا کی جانب سے باضابطہ نوٹیفکیشن جاری کر دیا گیا ہے۔

جاری کر دہ نوٹیفکیشن کے مطابق ضلع نارووال میں یکم نومبر بروز ہفتہ حضرت پیر سید جماعت علی شاہ لاثانی آف علی پور سیداں شریفؒ کے سالانہ عرس کے موقع پر عام تعطیل کا اعلان کیا گیا ہے۔

عرس کے موقع پر سیکیورٹی کے سخت انتظامات کیے گئے ہیں۔ پولیس، ریسکیو 1122 اور محکمہ صحت کے اہلکاروں کو خصوصی ڈیوٹیاں تفویض کر دی گئی ہیں تاکہ کسی بھی ناخوشگوار واقعے سے بچا جا سکے۔

نوٹیفکیشن کے مطابق، عام تعطیل کے باوجود اسپتال، ایمرجنسی سروسز، پولیس اور میونسپل ادارے اپنی معمول کی ڈیوٹی سرانجام دیتے رہیں گے۔

دوسری جانب عرس کے موقع پر ملک بھر سے زائرین کی بڑی تعداد علی پور سیداں شریف پہنچنے کی توقع ہے،اس حوالے سے ضلعی انتظامیہ نے زائرین کے لیے قیام و طعام، وضو، کھانے پینے اور طبی سہولیات کے خصوصی انتظامات مکمل کر لیے ہیں۔

عرس کے دوران قرآن خوانی، نعت خوانی اور روحانی محافل کا انعقاد کیا جائے گا جن میں علمائے کرام اور مشائخ حضرت پیر سید جماعت علی شاہ لاثانیؒ کی دینی و روحانی خدمات پر روشنی ڈالیں گے۔