ایران پر حملے کا خدشہ ،متعددیورپی ایئر لائنز کی مشرقِ وسطیٰ کے لیے پروازیں معطل

ویب ڈیسک : ایران پر امریکی حملے کا خدشہ بڑھ گیا ہےجس کے پیش ِ نظر متعدد یورپی ایئر لائنز نے مشرقِ وسطیٰ کے لیے پروازیں معطل کردی ہیں۔

غیر ملکی میڈیا رپورٹس کے مطابق ایئر فرانس، لفتھانسا، ایئر کینیڈا اور کے ایل ایم نیدرلینڈز کی جانب سے جاری ایک اعلامیہ میں کہا گیا ہے کہ اتوار تک اسرائیل، سعودی عرب اور متحدہ عرب امارات کے لیے پروازیں آپریٹ نہیں کریں گے۔ 

بی بی سی کی رپورٹ کے مطابق یہ پروازیں ایران اور امریکہ کے درمیان ممکنہ فوجی تصادم کی وجہ سے منسوخ کی گئی ہیں۔

دوسری جانب برطانیہ نے ایران اور امریکہ کی کشیدگی کے باعث قطر میں لڑاکا طیارے تعینات کردیے ہیں ۔برطانوی میڈیا کے مطابق برطانوی فضائیہ نے قطر میں 4 ٹائفون لڑاکا طیارے تعینات کیے ہیں۔

اس حوالے سے برطانوی وزارتِ دفاع نے بتایا کہ قطر میں لڑاکا طیارے دفاعی مقصدکے تحت بھیجے گئے ہیں۔