ٹی 20 ورلڈکپ کا پہلا اپ سیٹ،زمبابوے نے آسٹریلیا کو23 رنزسے شکست دیدی

کولمبو:آئی سی سی ٹی ٹوئنٹی ورلڈکپ 2026 کا پہلا اپ سیٹ ہوگیا جس میں زمبابوے نے آسٹریلیا کو 23 رنز سے شکست دے دی۔

تفصیلات کے مطابق کولمبو کے آر پریماداسا سٹیڈیم میں کھیلے جارہے میچ میں آسٹریلیا نے زمبابوے کے خلاف ٹاس جیت کر فیلڈنگ کا فیصلہ کیا، میچ مچل مارش کی غیر موجودگی میں ٹریوس ہیڈ آسٹریلوی ٹیم کی قیادت کررہے ہیں۔

 زمبابوے نےپہلے بلے بازی کرتے ہوئے آسٹریلیا کو جیت کے لیے 170 رنز کا ہدف دیا ، زمبابوے کی جانب سے مارومانی 35، رائن برل 35 رنز بنا کر آؤٹ ہوئے، اوپنر برائن بینیٹ 64 اور کپتان سکندر رضا 25رنز بنا کر ناقابل شکست رہے۔

ہدف کے تعاقب میں آسٹریلیا کی ٹیم 20 ویں اوور میں 146 رنز بنا کر آؤٹ ہوگئی۔

آسٹریلیا کے میٹ رنشا نے 65 اور گلین میکسویل نے 31 رنز بنائے، جبکہ زمبابوے کے مزربانی نے 4 اور بریڈ ایوان نے 3 کھلاڑیوں کو آؤٹ کیا۔ میچ میں بیٹنگ کے دوران آسٹریلیا کے 8 کھلاڑی ڈبل فیگر میں بھی داخل نہ ہوسکے۔

واضح رہے کہ دونوں ٹیموں کا یہ دوسرا میچ تھا، اپنے پہلے میچ میں زمبابوے نے عمان کو اور آسٹریلیا نے آئرلینڈ کو شکست دی تھی۔