بانی پی ٹی آئی کو اسپتال منتقل کرنے کی درخواست مستر د،عدالت کا علاج کیلئے میڈیکل بورڈ تشکیل دینے کا حکم

اسلام آبادہائیکورٹ نے پاکستان تحریک انصاف (پی ٹی آئی )کے چئیرمین اور سابق وزیر اعظم عمران خان کو فوری طور پر اسپتال منتقل کرنے کی درخواست مسترد کرتے ہوئے ان کے طبی معائنے کیلئے نئے میڈیکل بورڈ کی تشکیل کا حکم دے دیا ہے۔

تفصیلات کے مطابق اسلام آباد ہائیکورٹ میں بانی پی ٹی آئی کے طبی معائنے اور ان کی اسپتال منتقلی کے حوالے سے دائر کردہ درخواست پرسماعت ہوئی۔

دوران سماعت جسٹس ارباب طاہر نے وکیل درخواست گزار سے کہا کہ ہم نے گوگل بھی کیا تھا، ڈاکٹر ندیم قریشی بہترین ریٹینا اسپیشلسٹ ہیں، آپ ان کو شفا انٹرنیشنل اسپتال منتقل کرکے ٹیسٹ کرلیں ، ہم یہ نہیں کہیں گے کہ اتنے دن رکھیں، اتنا وقت رکھیں، یہ تسلیم شدہ ہے ایشو ہے اور علاج ہو رہا ہے۔

عدالت نے کہا کہ ہم یہ نہیں کہیں گے کہ تین دن یا تین ماہ رکھیں، دیکھ لیں یہ ساری ذمہ داری آپ لے رہے ہیں، اگر کل کچھ ہو گیا تو کیا آپ ذمہ داری لیں گے ، اس پر ایڈووکیٹ جنرل ایاز شوکت نے کہا کہ ہم ذمہ داری لیں گے۔

اس سے قبل عدالت نے عمران خان کی جیل سے نجی اسپتال منتقلی کی درخواست پر فیصلہ محفوظ کیا جو کچھ دیر بعد سناتے ہوئے استدعا مسترد کردی۔

علاوہ ازاں دوران سماعت عدالت نے چیف کمشنر اسلام آباد کو نیا میڈیکل بورڈ تشکیل دینے کی ہدایات کیں،جس میں ڈاکٹر عارف اور  ڈاکٹر ندیم قریشی کو بھی شامل کرنے کا حکم دیا گیا ہے۔

عدالت نے کہا کہ میڈیکل بورڈ فیصلہ کرے گا کہ عمران خان کو اسپتال منتقل کرنا ہے یا نہیں،جبکہ اسلام آباد ہائیکورٹ نے جیل رولز کے مطابق فیملی کو آگاہ کرنے کی ہدایت کرتے ہوئے کہا کہ ڈاکڑ ندیم قریشی فیملی کے ساتھ رابطے میں رہیں۔