خارگ جزیرے پر حملے کے بعد امارات میں امریکی ٹھکانے اب ہمارے جائز اہداف ہیں، ایران کا انتباہ

تہران:ایران کے پاسداران ِ انقلاب نے خارگ جزیرےپر امریکی حملے کے بعد ردعمل دیتے ہوئے متحدہ عرب امارات کو خبردار کیا ہے کہ وہاں موجود امریکی ٹھکانے اب جائز اہداف ہیں۔

ایرانی خبر رساں ادارے تسنیم کے مطابق ایرانی پاسدارانِ انقلاب نے متحدہ عرب امارات کو آگاہ کر دیا ہے کہ امریکا کی جانب سے ایران کے خارگ جزیرے پر حملے کے بعد امارات میں موجود امریکی ٹھکانے اب جائز فوجی اہداف تصور کیے جائیں گے۔

رپورٹس کے مطابق پاسداران انقلاب کے بیان میں کہا گیا ہے کہ اپنے قومی اقتدارِ اعلیٰ اور سرزمین کے دفاع کے لیے یہ جائز حق رکھتے ہیں کہ امریکی دشمن کے میزائل چلائے جانے کے مقامات کو نشانہ بنائے، جن میں بحری جہاز رانی کی بندرگاہیں، ڈاکس اور متحدہ عرب امارات کے بعض شہروں میں قائم امریکی فوجیوں کے ٹھکانے شامل ہیں۔

پاسداران انقلاب کی جانب سے جاری بیان میں متحدہ عرب امارات کے رہائشیوں اور آبادیوں کو بھی متنبہ کیا گیا ہے کہ وہ ممکنہ نقصان سے بچنے کے لیے بندرگاہوں، ڈاکس اور امریکی فوجی تنصیبات کے قریب علاقوں کو خالی کر دیں۔

خیال رہے کہ اس سے پہلے امریکی صدر ڈونلڈ ٹرمپ نے دعویٰ کیا کہ آج امریکی افواج نے ایران کے خارگ جزیرے اور فوجی اہداف پر مشرق وسطیٰ کی تاریخ کے طاقتور ترین حملے کیے۔

ٹروتھ سوشل پر جاری بیان میں امریکی صدر نے کہا کہ ایران کے تاج زیور، خارگ جزیرہ میں ہر فوجی ہدف کو مکمل طورپر مٹا دیا گیا ہے، ہمارے ہتھیار سب سے زیادہ طاقتور اور نفیس ہیں۔

دوسری طرف ایرانی حکام نے ٹرمپ کے دعویٰ مسترد کرتے ہوئے بتایا کہ تیل تنصیبات محفوظ ہیں مگر امریکی اڈوں کو اب زیادہ شدت سے نشانہ بنایا جائے گا۔

یاد رہے کہ خارگ نامی جزیرہ ایران کے ساحل سے 25 کلومیٹر دور واقع ہے، جہاں سے ایران کا 90 فیصد تیل عالمی منڈی میں جاتا ہے۔