بچوں کا قاتل نیتن یاہواگر زندہ ہے توپوری طاقت کے ساتھ تعاقب کر کے اسے قتل کریں گے،ایران 

تہران :ایران کی پاسداران انقلاب نے ایک بیان میں کہا گیا ہے اگر یہ بچوں کوقتل کرنے والا مجرم نیتن یاہو زندہ ہے تو ہم پوری طاقت کے ساتھ اس کاتعاقب کرکے قتل کریں گے۔

قطری نشریاتی ادارےالجزیرہ کے مطابق یہ اعلان اس وقت سامنے آیا ہے جب ایران، اسرائیل اور امریکا کے درمیان جاری کشیدہ تعلقات اور جنگی صورتحال میں شدت آ رہی ہے۔

ایران کی نیم سرکاری مہر نیوز ایجنسی نے پاسداران انقلاب کا یہ بیان رپورٹ کیا ہے کہ وہ نیتن یاہو کو ڈھونڈ کر قتل کرنے کی کوشش جاری رکھیں گے،بیان میں مزید کہا کہ وہ اسرائیل کے وزیر اعظم بنیامین نیتن یاہو کو نشانہ بنائے گی اور اگر وہ زندہ ہے تو ان کا تعاقب کر کے انہیں ختم کیا جائے گا۔

واضح رہے کہ اس سے قبل ایرانی میڈیا میں یہ دعویٰ بھی سامنے آیا تھا کہ حالیہ میزائل حملوں کے دوران نیتن یاہو مارے گئے ہیں۔ تاہم اسرائیلی وزیر اعظم کے دفتر نے ان خبروں کو مسترد کرتے ہوئے کہا کہ نیتن یاہو محفوظ ہیں اور ان کی ہلاکت سے متعلق خبریں بے بنیاد ہیں۔

خیال رہے کہ یہ بیان اس وقت سامنے آیا ہے جب ایران اور اسرائیل کے درمیان جاری کشیدگی اور امریکا کی مداخلت کے بعد خطے میں فوجی اور سیاسی تناؤ میں اضافہ ہو رہا ہے۔