برطانیہ کسی بھی صورت ایران اور امریکا کے درمیان جاری جنگ کا حصہ نہیں بنے گا،کئیر اسٹارمر

لندن:برطانوی وزیراعظم کیئر اسٹارمر نے کہا ہے کہ برطانیہ کسی بھی صورت ایران اور امریکا کے درمیان جاری جنگ کا حصہ نہیں بنے گا۔

تفصیلات کے مطابق میڈیا سے گفتگو کرتے ہوئے وزیر اعظم کئیر اسٹارمر نے کہا کہ یہ جنگ برطانیہ کی جنگ نہیں ہے اور نہ ہی اس تنازع سے ملک کا کوئی براہِ راست تعلق ہے۔ کیئر اسٹارمر کے مطابق ان کی پہلی اور آخری ترجیح برطانیہ اور اس کے عوام کا مفاد ہے۔

میڈیا سے گفتگو میں وزیراعظم نے زور دیا کہ چاہے کسی بھی قسم کا دباؤ یا درخواست سامنے آئے، برطانیہ اس جنگ میں شامل نہیں ہوگا۔ انہوں نے کہا کہ ایران امریکا کشیدگی کے باعث عالمی معیشت کو نقصان پہنچا ہے تاہم برطانوی حکومت کا فوکس اپنے ملک کی حفاظت اور استحکام پر ہے۔

کیئر اسٹارمر کا مزید کہنا تھا کہ حکومت واضح اور پرسکون قیادت فراہم کرنے پر توجہ دے رہی ہے اور ہر حال میں عوام کی سلامتی، قومی مفادات اور ملک کے تحفظ کو یقینی بنایا جائے گا۔

دوسری جانب برطانیہ، فرانس، جرمنی، اٹلی، کینیڈا، جاپان اور متحدہ عرب امارات سمیت 35 ممالک نے ایک مشترکہ اعلامیے پر دستخط کیے ہیں، جس میں ایران سے مطالبہ کیا گیا ہے کہ وہ آبنائے ہرمز کو بند کرنے کی کوششیں فوری طور پر بند کرے، اور اس عزم کا اظہار کیا گیا ہے کہ وہ اس اہم گزرگاہ میں محفوظ آمد و رفت کو یقینی بنانے کے لیے مناسب اقدامات میں حصہ ڈالیں گے۔