شہریوں کیلئے بڑا ریلیف : حکومت کا ٹرین کے کرایوں میں مجوزہ اضافہ روکنے کا فیصلہ 

اسلام آباد: پیٹرولیم مصنوعات میں ہوشربا اضافے کے بعد وزیراعظم شہباز شریف نے ریلوے مسافروں کیلئے بڑا ریلیف دیتے ہوئے ٹرین کرایوں میں مجوزہ 30 فیصد اضافے کو روکنے کا فیصلہ کیا ہے۔

تفصیلات کے مطابق وفاقی حکومت نے ڈیزل کی قیمتوں میں اضافے کا اثر خود برداشت کرنے کا فیصلہ کیا ہے، حالانکہ آپریشنل اخراجات پورے کرنے کیلئے کرایوں میں اضافہ ناگزیر قرار دیا جا رہا تھا۔

اس حوالےسے وزیراعظم شہبا زشریف نے ہدایات کی ہیں پر پاکستان ریلویز کی جانب سے کسی بھی کلاس کے کرایوں میں اضافہ نہ کیا جائے۔

اس فیصلے کے تحت اکانومی اور اے سی کلاسز سمیت تمام ٹرینوں کے کرایے موجودہ سطح پر برقرار رہیں گے۔ تاجر برادری کو سہولت دینے کیلئے فریٹ ٹرینوں کے کرایوں میں بھی کوئی اضافہ نہیں کیا جائے گا۔

وزیراعظم کی ہدایت پر 30 جون تک 6 ارب روپے کا اضافی بوجھ حکومت خود برداشت کرے گی تاکہ عوام کو مزید مالی دباؤ سے بچایا جا سکے۔

دوسری جانب وفاقی وزیرِ ریلوے محمد حنیف عباسی نے اس فیصلے کو عوام کیلئے تحفہ قرار دیتے ہوئے کہا کہ مشکل وقت میں وزیراعظم نے مسافروں کے دل جیت لیے ہیں اور ریلوے کا سفر ہر طبقے کی پہنچ میں برقرار رکھا گیا ہے۔