وزیر اعظم نے ٹول ٹیکس میںسہ ماہی 25 فیصد اضافہ معطل کر دیا

اسلام آباد: وفاقی حکومت نے عوام کو ریلیف دیتے ہوئے ٹول ٹیکس میں ہونے والا سہ ماہی اضافہ معطل کر دیا ہے۔

اس حوالے سے نیا نوٹیفکیشن بھی جاری کر دیا گیا ہے، جس کے مطابق 5 اپریل سے نافذ ہونے والا اضافہ فی الحال روک دیا گیا ہے۔

جاری کر دہ اعلامیے کے مطابق میں کہا گیا ہے کہ وزیراعظم پاکستان شہباز شریف کی خصوصی ہدایات پر عملدرآمد کرتے ہوئے وفاقی وزیر مواصلات عبدالعلیم خان نے ٹول ٹیکس میں 25 فیصد سہ ماہی اضافے کو باضابطہ طور پر واپس لینے کا اعلان کیا ہے۔

وزارت مواصلات کے مطابق ملک کی موجودہ معاشی صورتحال کے پیشِ نظر مالی سال 2025-26 کے دوران ٹول ٹیکس میں کسی قسم کا اضافہ نہ کرنے کا فیصلہ کیا گیا ہے، تاکہ عوام کو زیادہ سے زیادہ ریلیف فراہم کیا جا سکے۔

اعلامیے میں مزید کہا گیا ہے کہ وزیراعظم کی ہدایت کے مطابق عوامی مشکلات کم کرنے کے لیے ہر ممکن اقدامات کیے جائیں گے اور مہنگائی کے دباؤ میں کمی کے لیے ایسے فیصلے جاری رکھے جائیں گے۔