لبنان پر اسرائیلی جارحیت جاری، حالیہ فضائی حملوں میں مزید 11شہری شہید

بیروت: جنوبی لبنان پر صہیونی ریاست کی جارحیت مسلسل جاری ہے ،حالیہ اسرائیلی فضائی حملوں میں مزید 11 شہری جاں بحق جبکہ متعدد زخمی ہو گئے ہیں۔

غیر ملکی میڈیا رپورٹس کے مطابق لبنانی وزارت صحت کی جانب سے جاری ایک بیان میں کہا کہ جنوبی لبنان کے ایک گاؤں فرہتا پر اسرائیلی فضائی حملے میں 7 افراد ہلاک ہو گئے ہیں۔

وزارتَ صحت سے جاری بیان کے مطابق ہلاک ہونے والے افراد میں ایک 4 سالہ بچہ بھی شامل ہے۔ وزارت نے مزید کہا کہ بیروت کے جناح محلے پر ایک اور اسرائیلی حملے میں چار افراد ہلاک اور 39 دیگر زخمی ہوئے۔

سرکاری میڈیا کے مطابق دارالحکومت کے جنوبی مضافاتی علاقوں کو آٹھ فضائی حملوں کا نشانہ بنایا گیا۔ اس سے قبل اتوار کو لبنانی فوج نے کہا تھا کہ جنوبی لبنان میں اسرائیلی حملے میں ایک فوجی مارا گیا ہے،جبکہ گزشتہ گھنٹوں میں بیروت بھی حملوں کی آوازوں اور اونچی پرواز کرنے والے طیاروں کی آوازوں سے گونجتا رہا ہے۔

خیال رہے کہ لبنانی آبادی نے گزشتہ ماہ کے اوائل میں اسرائیل کے ساتھ لڑائی شروع ہونے کے بعد سے اپنے سب سے زیادہ پرتشدد دنوں کا تجربہ کیا ہے۔