امریکا ایران مذاکرات کا مشن ،وزیرِ اعظم دوحہ پہنچ گئے،امیرِ قطر شیخ تمیم بن آلثانی سے ملاقات ہوگی

دوحہ:امریکا مذاکرات کے حوالے سے پاکستان کی جانب سے بھرپور سفارتی کوشش جاری ہیں جس کے لیے وزیرِ اعظم محمد شہباز شریف سعودی عرب کے بعد دوحہ پہنچ گئے، جہاں وہ امیر قطر شیخ تمیم بن آلثانی سے اہم ملاقات کریں گے۔

تفصیلات کے مطابق دوحہ پہنچنے پر قطر کے وزیرِ مملکت برائے خارجہ امور سلطان بن سعد المریخی نے وزیرِ اعظم اور پاکستانی وفد کا پر تپاک استقبال کیا۔

وزیرِ اعظم اور پاکستانی وفد کو قطری مسلح افواج کے چاق و چوبند دستے نے سلامی بھی دی۔وزیرِاعظم اور پاکستانی وفد کی آمد پر دوحہ ائیرپورٹ اور دوحہ شہر کو پاکستانی پرچموں سے سجایا گیاہے۔

دورے کے دوران وزیرِ اعظم محمد شہباز شریف امیرِ قطر شیخ تمیم بن حمد آلثانی سے دو طرفہ ملاقات کریں گے ۔ملاقات میں پاکستان کی خطے اور عالمی امن کیلئے جاری کوششوں پر تبادلہ خیال کیا جائے گا۔

نائب وزیرِ اعظم اور وزیرِ خارجہ سینیٹر محمد اسحاق ڈار، وزیرِ اطلاعات و نشریات عطاء اللہ تارڑ، معاون خصوصی طارق فاطمی اور وزیرِ اعظم کے ترجمان برائے بین الاقوامی میڈیا مشرف زیدی بھی وزیرِ اعظم کے ہمراہ ہیں۔