وزیر اعظم کا لبنان میں جنگ بندی کے اعلان کا خیر مقدم

انطالیہ: وزیراعظم شہباز شریف نے لبنان میں جنگ بندی کے اعلان کا خیر مقدم کیا اور کہا کہ جنگ بندی صدر ٹرمپ کی سفارتی کوششوں کے نتیجے میں ہوئی۔

تفصیلات کے مطابق سوشل میڈیا پلیٹ فارم ایکس پرجاری بیان میں وزیراعظم شہباز شریف نے کہا کہ امید ہے لبنان میں جنگ بندی پائیدار امن کی راہ ہموار کرے گی، پاکستان لبنان کی خودمختاری اور علاقائی سالمیت کی غیر متزلزل حمایت کا اعادہ کرتا ہے۔

بیان میں انہوں نے مزید کہا کہ پاکستان خطے میں دیرپا امن کیلئے تمام کوششوں کی حمایت جاری رکھے گا۔

خیا ل رہے کہ، وہ ترک صدر رجب طیب اردوان کی دعوت پر انطالیہ ڈپلومیسی فورم میں شرکت کیلئے ترکیہ میں موجود ہیں۔

وزیرِ اعظم آج انطالیہ میں منعقدہ پانچویں ڈپلومیسی فورم میں ’’آئندہ کل کے لائحہ عمل و غیر یقینی صورتحال کے انتظام‘‘ کے موضوع پر منعقدہ لیڈرز پینل میں شرکت کریں گے اور پینل گفتگو میں پاکستان کا نقطہ نظر پیش کریں گے۔

وزیرِاعظم فورم کی افتتاحی تقریب میں بھی شرکت کریں گے، اس موقع پر وزیرِ اعظم ترک صدر رجب طیب ایردوان کے ساتھ ساتھ فورم میں شریک دیگر عالمی رہنماؤں سے بھی ملاقاتیں بھی بھی ہوں گی۔

اس سے قبل وزیراعظم شہباز شریف سعودی عرب اور قطرکا دورہ کیا جہاں انہوں نے سعودی ولی عہد محمد بن سلمان اور قطری امیرسے ملاقات کی جس میں انہوں نے دو طرفہ تعاون، تعلقات ، باہمی تجارت اور ایران و امریکا کے مابین ہونے والے مذاکرات کے حوالے سے تفصیلی گفتگوکی