پاکستان نے یو اے ای کو 2 ارب ڈالر کا قرضہ واپس کر دیا،اسٹیٹ بینک کی تصدیق

اسلام آباد:پاکستان نے متحدہ عرب امارات (یو اے ای) کو 2 ارب ڈالر قرض واپس کر دیا ہے، جس کی تصدیق اسٹیٹ بینک کی جانب سے کر دی گئی ہے۔

تفصیلات کے مطابق ہفتے کو اسٹیٹ بینک نے متحدہ عرب امارات کو ادائیگی کی تصدیق کرتے ہوئے کہا کہ یو اے ای کو قرض کی مکمل ادائیگی کے باوجود ملکی زرمبادلہ کے ذخائر پر کوئی منفی اثر نہیں پڑے گا۔

پاکستان کو 23 اپریل کو متحدہ عرب امارات کو مزید ڈیڑھ ارب ڈالر کی ادائیگی بھی کرنا ہے۔ اس حوالے سے اسٹیٹ بینک کے ذرائع کا کہنا ہے کہ بیرونی ادائیگیوں کے لیے تمام انتظامات مکمل ہیں۔

ذرائع وزارت خزانہ نےمزید بتایاکہ پاکستان اس رقم پر 6 فیصد کی شرح سے سود ادا کررہا تھا، یواےای اس رقم کو پہلے سالانہ بنیاد پر رول اوور کررہاتھا، دسمبر 2025 میں یہ رقم ایک مہینے کیلئے اور پھر دو مہینے کیلئے رول اوور کی گئی۔

خیال رہے کہ ترجمان اسٹیٹ بینک کا کہنا ہے کہ یہ رقم سیف ڈیپازٹ کےطور پر پاکستان کے اکاؤنٹ میں تھی،ترجمان کے مطابق ادائیگیوں کے باوجود ملکی ڈالر ذخائر مستحکم رہیں گے اور مالی ذمہ داریوں کی بروقت ادائیگی یقینی بنائی جا رہی ہے۔

دوسری جانب گزشتہ دنوں پاکستان کو سعودی عرب کی جانب سے 2 ارب ڈالرز فنڈز کی مد میں موصول ہوئے  اور سعودی عرب نے پاکستان کو 3 ارب ڈالرز ڈپازٹ کرانے کی یقین دہانی کرائی ہے۔چ