بھارتی وزیر دفاع راجناتھ سنگھ آبدوز کے داخلی راستے پر پھنس گئے،ویڈیو سوشل میڈیا پر وائرل

برلن:بھارت کے وزیر دفاع راج ناتھ سنگھ جرمنی کے دورے کے دوران ایک آبدوز کے اندر داخل ہونے کی کوشش میں غیر متوقع طور پر توازن کھو بیٹھے، جس کی ویڈیو سوشل میڈیا پر وائرل ہو گئی ہے۔

غیر ملکی میڈیا رپورٹس کے مطابق بھارتی کے وزیر دفاع راج ناتھ سنگھ جرمنی کے دورے کے دوران ایک جرمن آبدوز کا معائنہ کر رہے تھے، جہاں وہ اندر داخل ہونے کی کوشش کرتے ہوئے پھسل گئے اور مختصر طور پر داخلی حصے میں پھنس گئے۔

سوشل میڈیا پر وائرل ہونے والی ویڈیو میں دیکھا جا سکتا ہے کہ جیسے ہی راج ناتھ سنگھ آبدوز کے داخلی راستے پر قدم رکھنے کی کوشش کرتے ہیں، ان کا ایک پاؤں پھسل کر نیچے چلا جاتا ہے جبکہ دوسرا پاؤں اوپر والے حصے میں الجھ جاتا ہے، جس کے باعث وہ غیر متوازن ہو جاتے ہیں۔

Indian Defense Minister Rajnath Singh gets stuck while boarding a German submarine during his visit to Germany. pic.twitter.com/ial1G28hfO

— South Asia Index (@SouthAsiaIndex) April 24, 2026

ویڈیو کے مطابق اس موقع پر آبدوز پر موجود جرمن اہلکار فوری طور پر آگے بڑھے اور بھارتی وزیر دفاع کو سہارا دے کر صورتحال کو سنبھالنے میں مدد فراہم کی۔

خیال رہے کہ یہ واقعہ جرمنی میں ان کے دورے کے دوران پیش آیا جہاں وہ دفاعی تعاون اور بحری ٹیکنالوجی کے حوالے سے مختلف تنصیبات کا معائنہ کر رہے تھے،واقعے کی ویڈیو مختلف سوشل میڈیا پلیٹ فارمز پر تیزی سے وائرل ہو رہی ہے، جہاں صارفین کی جانب سے اس پر مختلف تبصرے کیے جا رہے ہیں۔