پاکستان اور یورپی یونین کے درمیان شراکت داری اور باہمی تعاون کے فروغ پر اتفاق

اسلام آباد: نائب وزیراعظم اور وزیر خارجہ اسحاق ڈار سے پاکستان کے دورہ پر آئیں یورپی یونین کی نمائندہ کایا کالاس نے ملاقات کی، جس میں پاکستان اور یورپی یونین کے درمیان تعلقات کومزید مضبوط بنانے اور شراکت داری کے مزید فروغ پر اتفاق کیا گیا۔

دوران ملاقات اسحاق ڈار نے کہا کہ یورپی یونین کی قیادت اور اعلیٰ نمائندہ کی پاکستان کیساتھ مسلسل روابط قابل قدر ہیں،عالمی و علاقائی امور خصوصاً پاک بھارت اور امریکا ایران تنازع پر قریبی رابطہ رہا۔

اسلام آباد میں نائب وزیراعظم اسحاق ڈار کے ساتھ مشترکہ نیوز کانفرنس سے خطاب کرتے ہوئے کایا کالاس نے کہا کہ پاکستان کو بین الاقوامی قانون کے مطابق اپنے دفاع اور اپنے شہریوں کے تحفظ کا مکمل حق حاصل ہے، تاہم علاقائی تنازعات کے حل کے لیے مذاکرات ہی بہترین راستہ ہیں۔

بعد ازاں کایا کالاس کے ہمراہ پریس کانفرنس کرتے ہوئے اسحاق ڈار نے کہا کہ پاکستان اور یورپی یونین کے درمیان خوشگوار تعلقات قائم ہیں،کایا کالاس کادورہ پاکستان یورپی یونین کے درمیان تعلقات کے فروغ کاعکاس ہے۔

انہوں نے کہا کہ یورپی یونین نے مسلسل دونوں ممالک پر تحمل کا مظاہرہ کرنے اور کشیدگی میں کمی لانے پر زور دیا، کیونکہ موجودہ حالات میں فضائی حملوں کے بجائے مذاکرات ہی مسائل کا مؤثر حل ہیں۔کایا کالاس نے کہا ہے کہ افغانستان سے دہشت گردی کے خلاف پاکستان کو اپنے دفاع کا مکمل حق حاصل ہے۔

پریس کانفرنس میں کایا کالاس نے کہا کہ سٹریٹجک مذاکرات کے دوران مختلف اہم علاقائی اور عالمی امور پر تبادلہ خیال کیا گیا، انہوں نے اسلام آباد میں پرتپاک استقبال پر نائب وزیراعظم و وزیر خارجہ اسحاق ڈار کا شکریہ ادا کرتے ہوئے امید ظاہر کی کہ آنے والے برسوں میں پاکستان اور یورپی یونین کے درمیان تعاون مزید فروغ پائے گا۔

انہوں نے مزید کہا کہ یورپی یونین نے ہمیشہ امن اور سفارتکاری کی حمایت کی، یورپی یونین پاکستان کا اہم تجارتی شراکت دار ہے ، دوطرفہ تجارت اور سرمایہ کاری کے فروغ پر توجہ مرکوز ہے۔

یورپی یونین کی نمائندہ نے مزید کہا کہ پاکستان نے امریکا ایران تنازعے میں ثالثی کے دوران اہم کردار ادا کیا ، یورپی یونین اور پاکستان کے درمیان اسٹریٹجک شراکت داری کے فروغ کیلئے کام کر رہے ہیں۔

اسحاق ڈار نے کہا کہ پاکستان یورپی یونین سٹریٹجک وژن طویل المدتی شراکت داری کو نئی سمت دے سکتا ہے، جبکہ سٹریٹجک ڈائیلاگ کا تسلسل دونوں فریقوں کے درمیان متحرک اور مستقبل پر مبنی تعلقات کی عکاسی کرتا ہے۔

انہوں نے امید ظاہر کی کہ مذاکرات کے حالیہ دور سے مثبت اور بامعنی نتائج برآمد ہوں گے اور دونوں جانب تعاون کے نئے شعبوں کی تلاش اور مشترکہ مفادات کے فروغ پر توجہ دی جائے گی۔

اسحاق ڈار نے کہا کہ پاکستان یورپی یونین کے ساتھ اپنے تعلقات کو انتہائی اہمیت دیتا ہے اور یہ امر قابلِ ذکر ہے کہ یورپی یونین کے کسی اعلیٰ خارجہ پالیسی عہدیدار کا پاکستان کا یہ پہلا دورہ 7 برس بعد ہو رہا ہے۔ان کا مزید کہنا تھا کہ مسئلہ کشمیر اقوام متحدہ کی قراردادوں کے مطابق حل ہونا چاہیے۔