ورلڈ کپ کے دوران سفری پابندیاں،ایرانی فٹبال فیڈریشن کا فیفا سے رجوع کرنے کا اعلان

تہران:ورلڈ کپ کے دوران ٹیم اور کوچنگ اسٹاف پر عائد  پابندیوں کے خلاف ایرانی فٹبال فیڈریشن نے فیفا سے باضابطہ رجوع کرنے کا اعلان کر دیا۔

ایرانی فٹبال فیڈریشن کے مطابق امریکا میں سفری پابندیوں کے باعث ٹیم کے کوچنگ اسٹاف کے منصوبے متاثر ہو رہے ہیں اور تیاریوں میں غیر ضروری رکاوٹیں پیدا ہو رہی ہیں۔

غیر ملکی میڈیا رپورٹس کے ماطبق اس حوالے سے فٹبال فیڈریشن کا کہنا ہے کہ میکسیکو میں قائم ٹیم کیمپ سے اتوار کے روز لاس اینجلس روانگی کی اجازت نہیں دی گئی، جس سے ٹیم کے شیڈول اور انتظامی امور متاثر ہوئے۔

رپورٹس کے مطابق فیڈریشن نے مؤقف اختیار کیا کہ ورلڈ کپ جیسے عالمی ایونٹ میں شریک تمام ٹیموں کو مساوی سہولیات اور آزادانہ نقل و حرکت فراہم کی جانی چاہیے، اس معاملے پر فیفا سے فوری مداخلت کی درخواست کی جائے گی۔

واضح رہے کہ فیفا ورلڈ کپ 2026 کی میزبانی امریکا، میکسیکو اور کینیڈا مشترکہ طور پر کر رہے ہیں۔