اہم ملک کی طرف سے ویزا فری انٹری کا اعلان، کیا پاکستان شامل؟

 بیجنگ: چین نے غیر ملکی مسافروں کی آمد و رفت کو مزید آسان بنانے کے لیے اپنی ویزا فری انٹری پالیسی میں توسیع اور بارڈر کنٹرول پر جدید ڈیجیٹل سہولیات فراہم کرنے کے بڑے منصوبے کا اعلان کر دیا ہے۔

چین کی وزارتِ عوامی تحفظ کے مطابق یہ اقدامات ملک کو دنیا کے لیے مزید کھولنے اور بین الاقوامی وزیٹرز کے داخلے میں حائل رکاوٹوں کو کم کرنے کی حکومتی حکمت عملی کا حصہ ہیں۔ حکام کا کہنا ہے کہ اس منصوبے کا مقصد غیر ملکی سیاحوں، کاروباری افراد اور دیگر مسافروں کے لیے سفر کو زیادہ آسان، تیز اور مؤثر بنانا ہے۔

سرکاری خبر رساں ادارے ژنہوا کے مطابق ویزا فری ٹرانزٹ اور داخلے کے قوانین کو مزید بہتر بنایا جا رہا ہے، جبکہ نئے منصوبے کے تحت ای پاسپورٹ اور دیگر ڈیجیٹل سفری دستاویزات کے استعمال کو فروغ دیا جائے گا تاکہ کاغذی کارروائی اور انتظامی مشکلات میں کمی لائی جا سکے۔

حکام کے مطابق مزید اسمارٹ بارڈر چینلز بھی قائم کیے جائیں گے، جن کے ذریعے اہل مسافر امیگریشن کے مراحل پہلے سے زیادہ تیزی سے مکمل کر سکیں گے۔ اس کے ساتھ ویزا، رہائشی اجازت ناموں اور دیگر امیگریشن خدمات کو مرحلہ وار مکمل طور پر آن لائن منتقل کرنے کا بھی منصوبہ بنایا گیا ہے۔

وزارتِ عوامی تحفظ کے مطابق یہ اقدامات غیر ملکی مسافروں کے لیے سہولتیں بڑھانے کے سلسلے کی ایک اہم کڑی ہیں اور مستقبل میں ویزا، رہائش اور ڈیجیٹل امیگریشن نظام کو مزید مؤثر بنایا جائے گا۔

سرکاری اعداد و شمار کے مطابق اس وقت 50 ممالک کے شہریوں کو یکطرفہ ویزا فری داخلے کی سہولت حاصل ہے، جبکہ 55 ممالک کے مسافر 65 داخلی مقامات کے ذریعے 240 گھنٹے تک بغیر ویزا ٹرانزٹ کی سہولت سے فائدہ اٹھا سکتے ہیں۔

رپورٹ کے مطابق 2026 کے پہلے چھ ماہ کے دوران ملک آنے والے غیر ملکیوں کی تعداد تقریباً 2 کروڑ 30 لاکھ رہی، جو گزشتہ سال کی اسی مدت کے مقابلے میں 20.4 فیصد زیادہ ہے۔ حکام کا کہنا ہے کہ اس اضافے کی بڑی وجہ ویزا اور داخلے کی پالیسیوں میں نرمی ہے۔

اعداد و شمار کے مطابق سب سے زیادہ غیر ملکی مسافر جنوبی کوریا، روس، ملائیشیا، ویتنام، تھائی لینڈ، سنگاپور، امریکا، جاپان، منگولیا اور آسٹریلیا سے آئے۔ حکومت کا کہنا ہے کہ نئی سہولتوں کا مقصد بین الاقوامی روابط کو فروغ دینا اور دنیا بھر سے آنے والے افراد کے لیے سفر کو مزید آسان بنانا ہے۔