شادی سے انکار یا بلیک میلنگ؟ نوجوان پر تیزاب پھینکنے کے بعد فائرنگ

ویب ڈیسک: پشاور کے علاقے چمکنی میں شادی سے انکار پر لڑکی کی جانب سے مبینہ طور پر نوجوان پر تیزاب پھینکنے اور فائرنگ کرنے کا واقعہ پیش آیا ہے، پولیس نے ملزمہ کو گرفتار کرلیا۔

ایس ایچ او چمکنی فواد خان کے مطابق لڑکی نے نوجوان صدیق اللہ پر تیزاب پھینکا اور بعد ازاں ایک فائر بھی کیا۔ واقعے کے نتیجے میں نوجوان کے چہرے کا کچھ حصہ اور گردن متاثر ہوئی، جبکہ ملزمہ کے ہاتھ بھی تیزاب سے جھلس گئے۔

پولیس کے مطابق واقعے کے بعد دونوں کو طبی امداد کے لیے لیڈی ریڈنگ اسپتال منتقل کیا گیا، جہاں دونوں زیرِ علاج ہیں۔ ڈاکٹرز کے مطابق متاثرہ نوجوان کی حالت خطرے سے باہر ہے۔

شادی سے انکار پر پیش آیا واقعہ؟

ایف آئی آر کے مطابق صدیق اللہ اور عتیقہ کے درمیان دوستانہ تعلقات تھے، تاہم صدیق اللہ نے عتیقہ سے شادی کرنے سے انکار کردیا تھا۔ پولیس کے مطابق ابتدائی طور پر واقعے کو شادی سے انکار کے تناظر میں دیکھا جا رہا ہے۔

متاثرہ نوجوان نے پولیس کو دیے گئے بیان میں الزام عائد کیا ہے کہ ملزمہ اسے بلیک میل کر رہی تھی اور اس سے 20 لاکھ روپے کا مطالبہ کیا گیا تھا۔

تیزاب پھینکنے کے بعد فائرنگ

ایس ایچ او فواد خان کے مطابق تیزاب پھینکنے کے بعد لڑکی نے نوجوان پر ایک فائر بھی کیا۔ واقعے میں نوجوان کے چہرے اور گردن کا کچھ حصہ متاثر ہوا جبکہ ملزمہ کے ہاتھ بھی تیزاب سے جھلس گئے۔

پولیس نے ملزمہ کو گرفتار کرکے واقعے کا مقدمہ درج کرلیا ہے اور مختلف پہلوؤں سے تحقیقات شروع کردی ہیں۔

پولیس کا اہم بیان

ایس ایچ او چمکنی فواد خان کا کہنا ہے کہ لڑکی ذہنی طور پر مستحکم نہیں، تاہم پولیس واقعے کے تمام پہلوؤں کا جائزہ لے رہی ہے۔ تفتیش کے دوران واقعے کی اصل وجہ اور دونوں فریقین کے درمیان تعلقات سے متعلق مزید معلومات سامنے آنے کی توقع ہے۔

پولیس کے مطابق متاثرہ نوجوان اور ملزمہ دونوں اسپتال میں زیرِ علاج ہیں جبکہ مقدمے کی مزید تفتیش جاری ہے۔