نوجوانوں کو ایکسپورٹ انڈسٹری سے جوڑنے کا عملی قدم

ویب ڈیسک: پاکستان کی ایکسپورٹ انڈسٹری کے فروغ اور نوجوانوں کو عالمی تجارت کے شعبے سے منسلک کرنے کے لیے عملی اقدامات جاری ہیں۔ چیئرمین ینگ ایکسپورٹرز ایسوسی ایشن شعیب ایوب بٹالوی کی کاوشوں سے پاکستان اسکول آف ایکسپورٹس کے تحت نوجوانوں کو جدید ایکسپورٹ ٹریڈ کی عملی تربیت فراہم کی جا رہی ہے۔

اسی سلسلے میں ایکسپورٹ ٹریننگ پروگرام کے طلبہ نے علامہ اقبال انٹرنیشنل ایئرپورٹ لاہور کے کارگو کمپلیکس کا مطالعاتی دورہ کیا، جہاں انہیں ایکسپورٹ کارگو کی ترسیل کے مختلف مراحل، متعلقہ شعبہ جات اور عملی طریقۂ کار کے بارے میں تفصیلی بریفنگ دی گئی۔

طلبہ کو بتایا گیا کہ بین الاقوامی تجارت میں ایکسپورٹ کارگو کی بروقت اور مؤثر ترسیل کے لیے مختلف اداروں اور شعبہ جات کے درمیان مربوط رابطہ کس قدر اہم ہے۔ دورے کا مقصد نوجوانوں کو کتابی علم کے ساتھ ساتھ عملی تجربہ فراہم کرنا تھا تاکہ وہ ایکسپورٹ کے شعبے میں درکار پیشہ ورانہ مہارتوں سے بھی آراستہ ہوسکیں۔

اس موقع پر شعیب ایوب بٹالوی نے کہا کہ پاکستان کی معاشی مضبوطی کا ایک اہم راستہ برآمدات میں اضافہ ہے۔ نوجوانوں کو عالمی منڈیوں کے تقاضوں، جدید تجارتی طریقۂ کار اور ایکسپورٹ کے عملی پہلوؤں سے آگاہ کرکے ملکی برآمدی شعبے کو نئی طاقت دی جاسکتی ہے۔

انہوں نے کہا کہ پاکستان اسکول آف ایکسپورٹس کا مقصد ہزاروں نوجوانوں کو ہنر، علم اور عملی تجربہ فراہم کرنا ہے تاکہ وہ عالمی تجارتی منڈی میں مؤثر کردار ادا کرسکیں۔

انہوں نے مزید کہا کہ نوجوانوں کو ایکسپورٹ کے شعبے کے لیے تیار کرکے پاکستان کو مضبوط اور مسابقتی ایکسپورٹ اکانومی میں تبدیل کرنے کی کوششیں جاری رہیں گی۔