ہم اپنے سپر اسٹار کو عزت نہیں دیتے، اظہر محمود کا بابر اعظم پر بڑا بیان

ویب ڈیسک: پاکستان کے سابق آل راؤنڈر اظہر محمود نے اسٹار بلے باز بابر اعظم کے دفاع میں بڑا بیان دیتے ہوئے کہا ہے کہ پاکستان کے پاس صرف ایک سپر اسٹار ہے، لیکن ہم مسلسل اسے نیچے کھینچ رہے ہیں۔

اظہر محمود نے بابر اعظم کے ساتھ سابق کھلاڑیوں اور سوشل میڈیا ناقدین کے رویے پر بھی تنقید کی۔ ان کا کہنا تھا کہ بابر ایک مشکل دور سے گزرے اور پاکستان میں سابق کھلاڑیوں اور سوشل میڈیا پر موجود ناقدین کے رویے کی وجہ سے وہ خاصے دل برداشتہ تھے۔

سابق آل راؤنڈر کے مطابق انہوں نے بابر اعظم کے ٹیم سے باہر رہنے کے دوران تقریباً پانچ ماہ ان کے ساتھ وقت گزارا۔ اظہر محمود نے بتایا کہ اس عرصے میں بابر کافی پریشان تھے، تاہم وقت کے ساتھ ان میں پختگی آئی ہے۔

اظہر محمود نے بابر کی کپتانی پر بات کرتے ہوئے کہا کہ جب وہ کپتان ہوتے ہیں تو ان میں زیادہ طاقت اور اعتماد نظر آتا ہے اور وہ ٹیم کی قیادت کرتے ہوئے آگے بڑھ کر کارکردگی دکھانے کی کوشش کرتے ہیں۔

انہوں نے مزید کہا کہ بابر اعظم میں بہتری کی گنجائش ضرور ہے، لیکن ہر کھلاڑی میں ہوتی ہے۔ ان کے مطابق بابر کو وہ عزت ملنی چاہیے جس کے وہ حقدار ہیں۔

اظہر محمود کا یہ بیان پاکستان اور انگلینڈ کے درمیان ٹیسٹ سیریز کے آغاز سے قبل سامنے آیا ہے، جس کے بعد بابر اعظم کے حوالے سے ایک بار پھر بحث شروع ہوگئی ہے۔