فیلڈ مارشل عاصم منیر کا امن مشن کامیابی سے آگے بڑھ رہا ہے، طاہراشرفی

لاہور: پاکستان علماء کونسل کے چیئرمین اور انٹرنیشنل تعظیمِ حرمین شریفین کونسل کے سیکریٹری جنرل حافظ محمد طاہر محمود اشرفی نے کہا ہے کہ فیلڈ مارشل حافظ سید عاصم منیر کی مسلم اُمہ کے اتحاد و وحدت اور عالمی امن کے فروغ کے لیے مخلصانہ کوششیں اور امن مشن مثبت سمت میں کامیابی سے آگے بڑھ رہے ہیں۔

انہوں نے کہا کہ پاکستان، ترکیہ اور سعودی عرب کے درمیان دفاعی معاہدے کے بعد عالمی سطح پر یہ بحث جاری ہے کہ اس تعاون میں مزید کون سے ممالک شامل ہوں گے۔

حافظ طاہر محمود اشرفی نے کہا کہ ایک جانب امریکا اور ایران کے درمیان کشیدگی اور جنگ کے معاملات کسی حتمی نتیجے تک نہیں پہنچ رہے، جبکہ دوسری جانب موجودہ حالات میں پاکستان کو ایک اہم کردار ادا کرنے کا موقع ملا ہے۔

انہوں نے کہا کہ فیلڈ مارشل حافظ سید عاصم منیر کے حالیہ دورۂ ایران اور پاکستان و کویت کے درمیان بڑھتے دفاعی روابط سے واضح ہوتا ہے کہ دفاعی اعتبار سے عالمِ اسلام کا پاکستان پر اعتماد اور باہمی تعلقات کو مضبوط بنانے کا عمل تیزی سے آگے بڑھ رہا ہے۔

حافظ طاہر محمود اشرفی نے کہا کہ ہمیں اس صورتِ حال پر اللہ تعالیٰ کا شکر ادا کرنے کے ساتھ ساتھ اس امر کا بھی ادراک رکھنا چاہیے کہ دشمن افواہ سازی کے ذریعے اسلامی دنیا کی صفوں میں تقسیم پیدا کرنے کی کوشش کر رہا ہے۔

انہوں نے خبردار کیا کہ دشمن عرب اسلامی دنیا اور ایران کے درمیان تصادم پیدا کرنے اور مسلم اُمہ کے اندر شیعہ سنی اختلافات کو ہوا دینے کی کوشش کر سکتا ہے۔

انہوں نے کہا کہ موجودہ حالات میں مسلم ممالک کے درمیان اتحاد، باہمی اعتماد اور سفارتی و دفاعی تعاون وقت کی اہم ضرورت ہے، جبکہ پاکستان کا کردار خطے میں امن اور مسلم اُمہ کے اتحاد کے لیے اہمیت اختیار کر رہا ہے۔