پاکستان، سعودی عرب اور ترکیہ کا دفاعی تعاون نئے مرحلے میں داخل ہو گیا: طاہر اشرفی

اسلام آباد: چیئرمین پاکستان علماء کونسل حافظ محمد طاہر محمود اشرفی نے کہا ہے کہ پاکستان، سعودی عرب اور ترکیہ کے درمیان تاریخی دفاعی تعلق اور اسٹریٹجک شراکت داری آج ایک نئے اور مضبوط مرحلے میں داخل ہو چکی ہے۔

انہوں نے کہا کہ اس پیش رفت کے پسِ پشت فیلڈ مارشل سید عاصم منیر کی دوراندیش سوچ، حکمت و تدبر اور اتحادِ امت کا وژن، جبکہ سعودی ولی عہد و وزیراعظم شہزادہ محمد بن سلمان کی بصیرت، تعاون، تحمل اور پاکستان پر غیر متزلزل اعتماد نمایاں حیثیت رکھتے ہیں۔

مکہ معاہدے کے حوالے سے منعقدہ عالمی کانفرنس سے خطاب کرتے ہوئے حافظ طاہر اشرفی نے کہا کہ مشکل علاقائی اور عالمی حالات میں دونوں قیادتوں نے تصادم کے بجائے حکمت، اشتعال کے مقابلے میں تحمل اور اختلافات کے مقابلے میں باہمی اعتماد، مکالمے اور تعاون کا راستہ اختیار کیا۔

انہوں نے کہا کہ یہی طرزِ فکر پاکستان اور سعودی عرب کے تعلقات کو مزید مستحکم کرتے ہوئے عالمِ اسلام کے اتحاد، امن اور مشترکہ استحکام کی بنیاد مضبوط کر رہا ہے۔

حافظ طاہر اشرفی نے کہا کہ اسی سوچ اور جذبۂ وحدت کی عملی تصویر پاکستان کے اندر قومی پیغامِ امن کمیٹی کی جدوجہد میں بھی نظر آتی ہے، جو فیلڈ مارشل حافظ سید عاصم منیر کے وژن کے مطابق وزیراعظم پاکستان میاں شہباز شریف نے قائم کی ہے۔

انہوں نے کہا کہ قومی پیغامِ امن کمیٹی نے ملک میں بین المسالک و بین المذاہب ہم آہنگی، قومی وحدت، رواداری اور ریاست و مذہبی قیادت کے درمیان اعتماد اور مکالمے کے فروغ کے لیے قابلِ تحسین کردار ادا کیا ہے۔

ان کا کہنا تھا کہ مختلف مکاتبِ فکر اور طبقات کو پاکستان کے امن، استحکام اور قومی سلامتی کے مشترکہ مقصد پر یکجا کرنا یقیناً ایک اہم قومی خدمت اور ہماری تاریخ کا ایک یادگار باب ہے۔