ٹرمپ کا شی جن پنگ کا غیر معمولی استقبال

واشنگٹن: چینی صدر شی جن پنگ کے تین روزہ سرکاری دورۂ امریکا کے آغاز پر امریکی صدر ڈونلڈ ٹرمپ نے جوائنٹ بیس اینڈریوز پہنچ کر ان کا غیر معمولی اور پرتپاک استقبال کیا۔

شی جن پنگ اور ان کی اہلیہ پینگ لی یوان کی آمد پر ایئرپورٹ کے رن وے پر تقریباً 100 فٹ طویل سرخ قالین بچھایا گیا، جبکہ امریکی فضائیہ کے بینڈ، اعزازی دستے اور جنگی طیاروں کی پرواز نے استقبالیہ تقریب کو شاندار بنا دیا۔

ٹرمپ کی جانب سے کسی غیر ملکی رہنما کا جوائنٹ بیس اینڈریوز پر ذاتی طور پر استقبال کرنا غیر معمولی سفارتی اقدام ہے۔ دستیاب رپورٹس کے مطابق اس سے قبل 1962 میں صدر جان ایف کینیڈی نے برطانوی وزیراعظم ہیرالڈ میکملن کا ایئرپورٹ پر خود استقبال کیا تھا۔

اس موقع پر امریکی خاتون اول میلانیا ٹرمپ بھی موجود تھیں۔ وائٹ ہاؤس کے مطابق صدر ٹرمپ نے شی جن پنگ اور پینگ لی یوان کا بدھ کو ایئرپورٹ پر استقبال کیا، جبکہ جمعرات کو وائٹ ہاؤس میں باضابطہ استقبالیہ تقریب منعقد ہوگی۔

دونوں صدور کے درمیان ملاقات میں تجارت، مصنوعی ذہانت، نایاب معدنیات، تائیوان اور ایران سے متعلق امور سمیت امریکا اور چین کے باہمی تعلقات پر بات چیت متوقع ہے۔ واشنگٹن اور بیجنگ نے تجارتی جنگ بندی میں بھی توسیع پر اتفاق کیا ہے۔

شی جن پنگ نے اپنے دورے کے موقع پر کہا کہ چین اور امریکا دونوں عظیم قومیں ہیں اور دونوں ممالک کو حریف بننے کے بجائے شراکت دار کے طور پر آگے بڑھنا چاہیے۔ ان کا کہنا تھا کہ چینی قوم کی عظیم بحالی اور امریکا کو دوبارہ عظیم بنانا بیک وقت ممکن ہے اور اس کا فائدہ پوری دنیا کو پہنچ سکتا ہے۔

دورے کے دوران دونوں رہنما بند کمرہ ملاقاتوں کے علاوہ سرکاری عشائیے میں بھی شریک ہوں گے، جبکہ میلانیا ٹرمپ پینگ لی یوان کے لیے الگ پروگراموں کی میزبانی کریں گی۔