کور کمانڈرز کانفرنس: 9 مئی جیسے پرتشدد حالات کی کسی بھی کوشش سے قانون کے مطابق نمٹنے کا عزم

راولپنڈی: فیلڈ مارشل سید عاصم منیر نے کہا ہے کہ قوم کی حمایت سے مسلح افواج پاکستان کی خودمختاری، علاقائی سالمیت اور قومی سلامتی کے تحفظ کیلئے مکمل تیار ہیں۔

فیلڈ مارشل سید عاصم منیر کی زیرصدارت کور کمانڈرز کانفرنس ہوئی، جس میں شہدا کی بے مثال قربانیوں کو خراج عقیدت پیش کیا گیا۔ شرکا نے مسلح افواج، قانون نافذ کرنے والے اداروں اور مادر وطن کیلئے جانیں قربان کرنے والوں کیلئے فاتحہ خوانی بھی کی۔

فیلڈ مارشل عاصم منیر نے انٹیلیجنس بیسڈ آپریشنز مزید مؤثر بنانے اور جدید ٹیکنالوجی، بہتر تربیت اور تمام جنگی شعبوں کے انضمام کے ذریعے دفاعی صلاحیتیں بڑھانے کی ہدایت کی۔

آئی ایس پی آر کے مطابق شرکا نے کہا کہ کسی بھی جواز پر پُرتشدد انتشار یا 9 مئی جیسے حالات پیدا کرنے کی کوشش سے قانون کے مطابق فیصلہ کن اور بلاامتیاز انداز میں نمٹا جائے گا۔

فورم نے دہشتگردی کے خاتمے کیلئے زمینی کارروائیوں کے ساتھ مؤثر انتظامی و گورننس اقدامات اور قانون نافذ کرنے والے اداروں کی انٹیلیجنس بیسڈ کارروائیوں کو ناگزیر قرار دیا۔ شرکا نے افغانستان سے ہونے والی دہشتگردی کے خلاف ٹارگٹڈ کارروائیوں کو پاکستان کا دفاعی حق قرار دیتے ہوئے پولیس کی استعداد کار بڑھانے پر بھی زور دیا۔

کور کمانڈرز کانفرنس نے پاکستان، سعودی عرب اور ترکیہ کے درمیان مکہ مشترکہ دفاعی معاہدے کا خیرمقدم کرتے ہوئے اسے باہمی دفاعی تعاون کے فروغ کیلئے اہم قرار دیا۔ فورم نے سعودی عرب پر حوثی حملوں کی مذمت اور سعودی عرب سے اظہار یکجہتی کرتے ہوئے حرمین شریفین کے تحفظ کیلئے پاکستان کے عزم کا اعادہ کیا۔

شرکا نے مسئلہ کشمیر اقوام متحدہ کی سلامتی کونسل کی قراردادوں اور کشمیری عوام کی امنگوں کے مطابق حل کرنے کے مؤقف کا بھی اعادہ کیا۔