شہر قائد میں مون سون سسٹم داخل ، تین دن تک بارشوں کی پیشگوئی 

تفصیلات کے مطابق شہر قائد سمیت سندھ بھر میں مون سون کا نیا  سسٹم داخل ،کراچی سمیت صوبے کے دیگر شہروں میں تیز ہواؤں، گرج چمک کے ساتھ کہیں کہیں تیز بارش بھی ہوسکتی ہے۔ محکمۂ موسمیات کا  کہنا ہے کہ مون سو ن ہوائیں سندھ پر آج سے اثر انداز ہو سکتی ہیں۔ محکمۂ موسمیات کے مطابق کراچی میں آئندہ چوبیس گھنٹوں میں  مطلع جزوی ابر آلود رہنے اور بوندا باندی کا امکان ہے ، تاہم تیز ہواؤں اور گرج چمک کے ساتھ کہیں کہیں تیز بارش بھی ہوسکتی ہے۔ آج زیادہ سے زیادہ درجہ حرارت 33سے 35 ڈگری سینٹی گریڈ کے درمیان بڑھنے کا امکان ہے ۔شہر میں  ہوا میں نمی کا تناسب 69فیصد ہے جبکہ کم سے کم درجہ حرارت 28ڈگری سینٹی گریڈ ریکارڈ کیا گیا ۔

شہرقائد  میں اس وقت شمال مغربی اور مغربی سمت سے 18کلو میٹر فی گھنٹہ کی رفتار سےہوا  چل رہی ہیں۔   محکمۂ موسمیات کا کہنا ہے کہ حیدر آباد، ٹھٹھہ، سکھر، لاڑکانہ کے علاوہ خیر پور، جیکب آباد، شکار پور، جامشورو میں بھی 23 سے 25 ستمبر تک بارش کا امکان ہے۔ دوسری جانب لاہور سمیت پنجاب کے مختلف شہروں فیصل آباد، جہلم، ملتان، بہاولپور سمیت کئی علاقوں میں بارش ہوئی ہے۔

محکمہ موسمیات کی جانب سے کوئٹہ،خضدار اور زیارت میں بارش کی پیشگوئی کی گئی ہے۔ پشاور، مانسہرہ، مردان، چارسدہ میں موسلادھار بارش کا امکان ہے۔اس کے علاوہ گلگت بلتستان میں تیز ہواؤٔں اور گرج چمک کے ساتھ بارش کی توقع ہے جبکہ کشمیر میں چند مقامات پر موسلادھار بارش  متوقع ہے ۔