شفاف انتخابات کے لیے ٹیکنالوجی کی جانب جانا ہو گا:شبلی فراز

تفصیلات کے مطابق میڈیا سے گفتگو کرتے ہوئے وفاقی وزیر سائنس و ٹیکنالوجی کا کہنا تھا کہ اب الیکشن کمیشن نے ای وی ایم پر ٹیکنیکل ٹیم بنائی لیکن کچھ لوگ کہہ رہے ہیں مشین میں ایسی چیزیں ڈال دی گئی ہیں جس کی وجہ سے عوام میں کنفیوژن پھیلائی جا رہی ہے۔

شبلی فراز کا کہنا تھا کہ پرانے سسٹم سے فائدہ اٹھانے والے لوگ نہیں چاہتے کہ ٹیکنالوجی آئے، الیکشن کمیشن آر ایف پی دیں اور وہ جو بھی مشین منتخب کرنا چاہتے ہیں کریں کیونکہ ہم چاہتے ہیں کہ ای وی ایم کا عمل آگے بڑھے۔

انہوں نے کہا ہے کہ ہم نے ثابت کیا ہے کہ پاکستان میں مشین بن سکتی ہے اور ہمارا یہ مقصد نہیں کہ سائنس وٹیکنالوجی کی بنائی گئی مشین ہی استعمال ہو۔

وفاقی وزیر سائنس و ٹیکنالوجی کا کہنا تھا کہ پاکستان میں ہمیشہ انتخابات کے بعد تنازعات ہوتے ہیں اور ہم نے قبلہ درست نہ کیا تو آئندہ انتخابات بھی متنازع ہوں گے۔

ان کا مزید کہنا تھا کہ ہم کہہ رہے ہیں کہ الیکٹرانک ووٹنگ مشین انتخابات میں نیوٹرل ایمپائر ہے اور یہ بات تو طے ہے کہ آئندہ انتخابات الیکٹرانک ووٹ مشین کے ذریعے کرانے ہیں۔