ٹی ٹوئنٹی ورلڈ کپ : بھارت نے افغانستان کو66  رنز سے ہرا دیا

ابوظہبی میں کھیلے جانے والے اس میچ میں  بھارت نے پہلے کھیلتے ہوئے 211 رنز کا ہدف دیا تھا۔ افغانستان کی ٹیم 211 رنز کے تعاقب میں  7 وکٹوں پر 144 رنز بنا سکی۔  بھارت نے افغانستان کو66  رنز سے شکست دیدی ہے۔

افغانستان کی جانب سے کپتان محمد نبی 35 رنز کے ساتھ نمایاں رہے، حضرت اللہ زازئی 13  اور محمد شہزاد بغیر کوئی رن بنائے آوٹ ہوئے۔ رحمان اللہ گرباز 19 رنز بنا سکے جبکہ  گلبدین نائب 18 اور نجیب اللہ زردان 11 رنز بنا کر آوٹ ہوئے۔لیگ اسپنر راشد خان بغیر کوئی رن بنائے آؤٹ ہوئے، کریم جنت 42 رنز بنا کر ناٹ آؤٹ رہے۔

بھارت کے محمد شامی 3 وکٹیں اور روی ایشون 2 وکٹیں لے کر نمایاں رہے ہیں۔

قبل ازیں   بھارت نے افغانستان کو جیتنے کیلئے  211 رنز کا ٹارگٹ دیا تھا۔ بھارتی ٹیم نے 20 اوورز میں 2  وکٹوں پر  210 رنز بنائے،  بھارت کے روہیت شرما نے 74 رنز اور لوکیش راہول نے 69 رنز سکور کیے۔ رشبھ پنت 27 اور ہاردک پانڈیا 35 رنز کے ساتھ ناٹ آؤٹ رہے۔

افغانستان کی جانب سے گلبدین نائب اور کریم جنت ایک، ایک وکٹ حاصل کرسکے۔