محکمہ داخلہ نے انصار الاسلام پر پابندی لگانے کا ریفرنس کابینہ سے واپس منگوالیا

تفصیلات کے مطابق تحریک لبیک پاکستان پر عائد پابندیاں ختم ہونے کے بعد پنجاب حکومت کا ایک اور بڑا فیصلہ ،  محکمہ داخلہ نے انصار الاسلام پر پابندی لگانے کا ریفرنس کابینہ سے واپس منگوالیا۔ محکمہ داخلہ نے چند ماہ قبل کابینہ کو انصار اسلام پر پابندی لگانے کا ریفرنس ارسال کیا تھا۔

محکمہ داخلہ پنجاب کے مطابق  کئی ماہ تک محکمہ داخلہ نے اس کی پیروی ہی نہ کی گئی تھی ،  محکمہ داخلہ نے اب یہ ریفرنس بغیر کسی کاروائی کے واپس لے لیا ہے ،  انصار الاسلام مولانا فضل الرحمن کی ہی تنظیم ہے۔

یاد رہے رواں سال مارچ میں پاکستان ڈیموکریٹک موومنٹ (پی ڈی ایم) کے حکومت کے خلاف اسلام آباد کی طرف لانگ مارچ کے دوران پنجاب حکومت نے جے یو آئی (ف)کی ذیلی تنظیم الانصار پر پابندی لگانے کا فیصلہ کیا تھا۔

گزشتہ روز وزارت داخل نے کالعدم تحریک لبیک سے پابندی ہٹانےکا نوٹیفیکیشن  جاری کیا تھا۔  پنجاب حکومت نے وفاقی کا بینہ کو کالعدم تنظیم سے پابندی ہٹانے کی سمری بھیجی تھی  جس میں کہا گیا تھا کہ تنظیم نے آئندہ پُرتشدد نہ ہونے کی یقین دہانی کرائی ہے۔سمری کے مطابق ٹی ایل پی مستقبل میں آئین پاکستان اور ملک کے قوانین کا احترام کرے گی۔