نیکٹا نے ٹی ایل پی کا نام کالعدم تنظیموں کی فہرست سے نکال دیا

تفصیلات کے مطابق  تحریک لبیک پاکستان سے پابندی ہٹانے کے بعد  نیکٹا نے ٹی ایل پی کا نام کالعدم تنظیموں کی فہرست سے نکال دیا ہے۔ وزارت داخلہ نے گزشتہ روز ٹی ایل پی کا نام کالعدم جماعتوں کی فہرست سے نکالنے کا نوٹیفکیشن جاری کیا۔ وزارت داخلہ کے نوٹیفکیشن کے بعد نیکٹا نے بھی اپنی لسٹ سے نکال دیا۔

تحریک لبیک پاکستان کا نام کالعدم جماعتوں کی فہرست میں 79ویں نمبر پر تھا،  تحریک لبیک پاکستان کا نام 15اپریل2020 کو نیکٹا کی کالعدم فہرستوں کی لسٹ میں ڈالا گیا۔

قبل ازیں تحریک لبیک   پاکستان نے  وزیر آباد میں جاری دھرنے کو باقاعدہ ختم کرنے کا اعلان   کردیا تھا۔ تحریک لبیک کی جانب سے جاری کردہ بیان میں کہا گیا  تھا  کہ معاہدے کے عین مطابق جیسے  مفتی منیب الرحمان نے گارنٹی دی ہم اب مسجد رحمتہ اللعالمین جائیں گے ، تحریک لبیک اپنے معاہدے پر قائم ہے اب عرس علامہ خادم حسین رضوی  کی تیاری کی جائے گی ، عرس  19 تا 21 نومبر مرکز مسجد رحمتہ اللعالمین پر ہو گا۔انکا  کہنا تھا کہ  عرس علامہ حافظ خادم حسین رضوی پر علامہ سعد حسین رضوی ہمارے ساتھ ہونگے ، تحریک سے کالعدم ہٹ چکا ہے۔

خیال رہے کہ پنجاب حکومت نے وفاقی کا بینہ کو کالعدم تنظیم سے پابندی ہٹانے کی سمری بھیجی تھی  جس میں کہا گیا تھا کہ تنظیم نے آئندہ پُرتشدد نہ ہونے کی یقین دہانی کرائی ہے۔سمری کے مطابق ٹی ایل پی مستقبل میں آئین پاکستان اور ملک کے قوانین کا احترام کرے گی۔