اب حکومت کا دھڑن تختہ ہونے والا ہے:شہباز شریف

تفصیلات کے مطابق شہباز شریف کا کہنا تھا کہ سیاست عوامی خدمت اور لوگوں کے دکھ، درد بانٹنے کا نام ہے اور سیاست بیماروں کو سہولتیں فراہم کرنے کا نام ہے۔ ساڑھے 3 سال میں ملک کو کس نہج پر پہنچا دیا گیا ؟ ملک پر نااہل شخص کو مسلط کیا گیا۔

ان کا کہنا تھا کہ ہم نے ہی پنجاب کے سرکاری اسپتالوں کو دوبارہ بحال کیاجبکہ عمران نیازی حکومت نے پی کے ایل آئی اسپتال کا جنازہ نکال دیا جس سے شاندار اسپتال پورے پاکستان میں نہیں۔

مسلم لیگ ن کے صدر شہباز شریف کا کہنا تھا کہ آج لاکھوں لوگ بےروزگار ہو چکے ہیں،آپ کو تختیاں لگانے کا شوق تھا تو ہمیں بتاتے ہم آپ کو مامور کر دیتے تاہم تختیاں لگانے سے بات نہیں بنے گی اب تو آپ کا دھڑن تختہ ہونے والا ہے۔ 

ان کا کہنا تھا کہ ہم مشکل وقت میں عوام کے ساتھ کھڑے رہیں گے اور نواز شریف نے ہی ملک میں بجلی کی لوڈشیڈنگ کا خاتمہ کیا تھا۔

ان کا مزید کہنا تھا کہ میں نے جلد بازی میں کہا تھا کہ 6 ماہ میں بجلی لوڈشیڈنگ کا خاتمہ کروں گا اور میرے اس جملے پر تنقید ہوئی تاہم سیاست نام ہے عوام کی خدمت کرنے کا اور نواز شریف کو رات کو نیند نہیں آتی تھی وہ عوام کے لیے فکرمند رہتے تھے۔