کراچی : ایک ہی خاندان کے 11 افراد اومی کرون کا شکار

تفصیلات کے مطابق کراچی کے ضلع شرقی میں رہائش پذیر  ایک ہی خاندان کے 11 افراد میں اومی کرون وائرس کی تصدیق ہوئی ہے، متاثرہ افراد چند روز قبل لاہور سے کراچی پہنچے ہیں۔

محکمہ صحت سندھ کے مطابق متاثرین میں 8 خواتین اور 3 مرد شامل ہیں جن کی عمریں 26 سے 77 سال کے درمیان ہیں ۔ محکمہ صحت کاکہنا ہے کہ  کراچی میں اب تک اومی کرون کے 44 کیسز سامنے آچکے ہیں ۔ 

محکمہ صحت کے مطابق  11 افراد میں تصدیق کے بعد دیگر اہل خانہ  اور رابطہ میں آنے والوں کے ٹیسٹ  کرنے کا فیصلہ کیا گیا ہے ، جبکہ متعلقہ افراد کو گھر میں  ہی قرطینہ کردیا گیا ہے ۔ 

محکمہ صحت  کی جانب سے گلشن اقبال  بلاک 7 میں اسمارٹ لاک ڈاون  کی  بھی سفارش کردی گئی ۔ اس حوالے سے ڈسٹرکٹ  ہیلتھ آفس  کی جانب سے متعلقہ ڈی سی  کو خط لکھ دیا گیا ہے ۔ 

دوسری جانب وفاقی دارالحکومت اسلام آباد میں اومی کورون کے  32 کیس رپورٹ ہوچکے ہیں ۔ ملک بھر میں  اومی کورون کے اب تک 79 کیسز رپورٹ  ہوچکے ہیں ۔

قومی ادارہ صحت کے مطابق پاکستان میں اومی کرون کا پہلا کیس 13 دسمبر کو کراچی میں رپورٹ ہوا تھا۔