خواہش ہے آفریدی اپنے آخری پی ایس ایل میں کوئٹہ گلیڈی ایٹرز کو جتواکر جائیں:سرفراز احمد

کوئٹہ گلیڈی ایٹرز کے کپتان اور وکٹ کیپر بلے باز سرفراز احمد کا کہنا ہے کہ پی ایس ایل 7 میں بہترین کارکردگی دکھانے کی کوشش کرتے ہوئے ٹرافی اپنے نام کریں گے اور ہماری ٹیم ٹورنامنٹ جیتنے کا ارادہ لیے ہی میدان میں اترے گی۔

سرفراز احمد کا کہنا تھا کہ کوئٹہ گلیڈی ایٹرز کی ٹیم اس بار بہت اچھی بنی ہے، جس میں تجربہ کار اور نوجوان کھلاڑیوں کا اچھا کمبینیشن بنا ہے جس سے بھرپور فائدہ اٹھانے کی کوشش کریں گے۔

ان کا کہنا تھا کہ شاہد آفریدی ایک بہترین آل راؤنڈر ہیں اور ہم ان کے تجربے سے فائدہ اٹھانے کی پوری کوشش کریں گے جب کہ ان کا ٹیم میں موجود ہونا بہت فائدہ مند ہوگا جب کہ میری خواہش ہے کہ شاہد آفریدی اپنے آخری پی ایس ایل میں کوئٹہ گلیڈی ایٹرز کو جتواکر جائیں۔

انہوں نے کہا ہے کہ مجھے ٹیم سے باہر رہ کر بھی کوئی پریشانی نہیں ہوئی اور جب میرے پاس ٹیم کی قیادت تھی تب بھی میں ایسا ہی تھا، کرکٹ اور زندگی میں یہ اتار چڑھاؤ آتے رہتے ہیں۔