اسٹیون اسمتھ کیچ روکنے کی کوشش کے دوران سر کے بل گر کر زخمی

سری لنکا کے خلاف سڈنی کرکٹ گراؤنڈ میں کھیلے گئے دوسرے ٹی ٹوئنٹی میچ کے سپر اوور میں مہیش تھکشنا نے اسٹوئنس کی تیسری گیند پر زوردار ہٹ لگائی تو ڈیپ مڈ وکٹ پر فیلڈنگ کرتے اسٹیو اسمتھ نے باؤنڈری سے باہر جاتی گیند کو ہوا میں اچھل کر کیچ کرنے کی کوشش کی۔

اسٹیو اسمتھ کیچ پکڑنے میں تو ناکام رہے لیکن انہوں نے اس دوران گیند کو باؤنڈری کے اندر پھینک دیا اور یقینی چھکا بچا لیا تاہم اس کوشش کے دوران وہ خود پر قابو نہ پا سکے اور باؤنڈری سے باہر سر کے بل گر کر کنکشن (سر چکرا کر بیہوش) کا شکار ہو گئے۔

اسٹیو اسمتھ انجری کا شکار ہو کر سری لنکا کے خلاف 5 ٹی ٹوئنٹی میچوں کی سیریز سے باہر ہو چکے ہیں اور حکام کو ان کے دورہ پاکستان کے حوالے سے فکر لاحق ہو گئی ہے۔

یاد رہے کہ اسمتھ دورہ پاکستان کے لیے ٹیسٹ اسکواڈ میں شامل ہیں اور آسٹریلین ٹیم نے 27 فروری کو پاکستان کے دورے پر پہنچنا ہے۔