پیپلزپارٹی نے پیٹرولیم مصنوعات کی قیمتوں میں اضافہ مسترد کردیا 

تفصیلات کے مطابق ایک بیان میں چئیرمین پی پی پی  بلاول بھٹو زرداری کا کہنا ہے کہ مہنگائی، بےروزگاری اور کرپشن کے بعد عمران خان نے تیل کی قیمت بھی ریکارڈ سطح پر پہنچا دی ہے، ، جسے پاکستان قبول نہیں کرے گا۔ان کاکہنا تھا کہ  جاتے جاتے عمران خان نے عوام پر مہنگائی کی بمباری تیز کردی ہے۔

انہوں نے کہا کہ سی این جی اسٹیشنز بھی تین ماہ سے بند تھے، تیل کی قیمتوں میں اضافہ مہنگائی میں مزید اضافہ کرے گا، اشیائے خور و نوش کے نرخ عوام کی پہنچ سے بھی باہر ہو جائیں گے، تیل کی قیمتوں میں اضافہ تو پہاڑ جتنا اور کمی چیونٹی جتنی بھی نہیں کی جاتی ہے۔ 

بلاول بھٹو نے مزید کہا  کہ 27 فروری سے لانگ مارچ عوام کی جیبوں پر ڈالے گئے ہر ڈاکے کا حساب لے گا، کٹھ پتلی سرکس کے خاتمے کے دن آن پہنچے ہیں۔

واضح رہے کہ حکومت نے پیٹرول کی قیمت میں 12 روپے 3 پیسے، ڈیزل کی قیمت میں 9 روپے 53 پیسے، مٹی کے تیل کی قیمت میں 10 روپے 8 پیسے اور لائٹ ڈیزل کی قیمت میں 9 روپے 43 پیسے فی لیٹر اضافہ کر دیا ہے۔