برازیل: بارشوں نے تباہی مچادی ، درجنوں ہلاک 

غیرملکی میڈیا کے مطابق  برازیل کی ریاست ریو ڈی جنیرو کے ایک پہاڑی علاقے میں آنے والے مٹی کے تودے اور سیلاب کے واقعات  میں کم از کم 94 افراد ہلاک ہو گئے ہیں۔ 

غیرملکی میڈیا کے مطابق شہر میں تیز بارشوں کے بعد ہونے والی لینڈ سلائیڈنگ سے متعدد سڑکیں بند، کئی مکانات اور گاڑیاں تباہ ہوگئیں۔حکام کاکہنا ہے کہ بہت سے لوگ تاحال ملبے تلے دبے ہوئے ہیں جبکہ  ہلاک افراد کی تعداد میں اضافہ ہوسکتا ہے۔ لینڈ سلائیڈنگ کے باعث  400 سے زائد لوگ بے گھر ہوگئے  ہیں  تاہم متاثرین کو محفوظ مقامات پر منتقل کیا جارہا ہے۔

مقامی انتظامیہ کے مطابق ہلاکتوں کے بعد شہر میں 3 دن سوگ کا اعلان کیا گیا ہے ۔ 

واضح  رہے کہ جنوب مشرقی برازیل سال کے آغاز سے ہی شدید بارشوں کی زد میں ہے، جنوری کے اوائل میں ریاست میناس گیریس اور رواں ماہ کے آخر میں  ریاست ساؤ پاؤلو میں ہونے والے لینڈسلائیڈنگ واقعات میں  40 سے زیادہ افراد جان سے ہاتھ دھو چکے ہیں ۔