آرمی چیف  جنرل قمر جاوید باجوہ سے بشپ  کینٹربری کی ملاقات، آئی ایس پی آر

پاک فوج کے شعبہ تعلقات عامہ (آئی ایس پی آر) کی جانب سے جاری کردہ بیان کے مطابق انگلینڈ کے ہیڈ آف چرچ اور کینٹربری کے آرک بشپ جسٹن ویلبے نے آرمی چیف جنرل قمر جاوید باجوہ سے ملاقات کی، ملاقات میں برطانوی ہائی کمشنر کرسچین ٹرنر بھی موجود تھے۔

آئی ایس پی آر نے کہا کہ  ملاقات میں باہمی دلچسپی کے امور، مذہبی و بین المذاہب ہم آہنگی پر بھی تبادلہ خیال کیا گیا، آرمی چیف نے پاکستان کے قیام میں عیسائی برادری کے کردار کو تسلیم کیا،  آرمی چیف نے ترقی کے لئے ان کے کردار کو بھی سراہا۔

ترجمان پاک فوج نے بیان میں کہا ہے کہ  آرمی چیف نے تعلیم، صحت اور عوامی بہبود کے لئے عیسائی برادری کے پاکستان بھر میں کردار کی تعریف کی، آرمی چیف نے خاص طور پر ملک کی مسلح افواج کا حصہ ہوتے ہوئے دفاع وطن میں ان کے کردار کو سراہا۔

آئی ایس پی آر کے مطابق  آنریری آرچ بشپ نے دہشت گردی کے خلاف پاکستان آرمی کی کوششوں کو سراہا، ملک میں اقلیتوں کے لئے محفوظ ماحول کے لئے پاکستان آرمی کی تعریف کی،معزز مہمان نے عوامی بہبود کے لئے عیسائی برادری کا کردار بھرپور طریقہ سے جاری رکھنے کے لئے کردار ادا کرنے کا عزم کا اظہار کیا۔