’اگلے 48 گھنٹوں میں تحریک عدم اعتماد لائی جائے گی‘

پاکستان ڈیموکریٹک موومنٹ (پی ڈی ایم ) کے سربراہ  مولانا فضل الرحمن نے میڈیا سے غیر رسمی گفتگو کرتے ہوئے کہا کہ  اسٹیبلشمنٹ کا مجھ سے کوئی رابطہ نہیں ہے، ن لیگ پیپلزپارٹی کا اسٹیبلشمنٹ سے رابطہ ہے یا نہیں، میرے علم میں نہیں ہے، اسٹیبلشمنٹ سے کسی نے انفرادی پور پر رابطہ کیا تو ادارے نے اس کا نوٹس لیا۔

مولانا فضل الرحمان کا کہنا ہے کہ  تمام اپوزیشن جماعتوں کا موجودہ حکومت کو گرانے پر اتفاق ہے۔حکومت گرانے کے بعد نئی حکومت کے قیام سے متعلق ابھی کوئی بات چیت نہیں ہوئی۔جب وہ مرحلہ آئے گا تو اس پر بھی فیصلہ کر لیا جائے گا،ہمارا فوکس ہے کہ خزاں جائے، بہار آئے یا نہ آئے،  ہم عدم اعتماد سے پہلے کسی داخلی تنازعے میں نہیں پڑنا چاہتے۔

پی ڈی ایم سربراہ نے کہا کہ  اگلے 48 گھنٹوں میں تحریک عدم اعتماد لائی جائے گی، اپوزیشن جماعتیں حکومت کی اتحادیوں پر انحصار نہیں کر رہی، ہمارا انحصار انفرادی شخصیات پر ہے۔

مولانا فضل الرحمان نے دعوی کیا ہے کہ  ہمارے پاس تحریک کی کامیابی کے لیے نمبرز پورے ہیں،امپائر بظاہر نیوٹرل نظر آ رہے ہیں، ہم نے ایمپائر سے کوئی سپورٹ نہیں لینی،ہم نے ایمپائر سے حکومت کی سپورٹ ختم کرانا تھی۔انہوں نے مزید کہا کہ  اب سیاسی جماعتیں ایک دوسرے پر اعتماد کر رہی ہیں،کیونکہ  اب اپوزیشن جماعتوں کی ضرورت کامن ہو گئی ہے، عدم اعتماد کی تحریک کی سو فیصد کامیابی کا یقین ہے۔حکومتی اتحادیوں سے بھی اپوزیشن جماعتیں رابطے میں ہیں۔