وزیرخارجہ سے یورپی کمیشن کے نائب صدر کا رابطہ ، یوکرین کی صورتحال پر تبادلہ خیال

تفصیلات کے مطابق وزیر خارجہ مخدوم شاہ محمود قریشی سے یورپی کمیشن کے نائب صدر اور یورپی یونین کے خارجہ امور اور سلامتی پالیسی کے اعلیٰ نمائندے جوزپ بوریل  نے ٹیلی فون پر رابطہ کیا ہے ۔ دونوں رہنماوں نے یوکرین کی موجودہ صورتحال اور اقوام متحدہ کی جنرل اسمبلی کے ہنگامی اجلاس پر تبادلہ خیال کیا ۔

وزیر خارجہ شاہ محمود قریشی نے روس اور یوکرین کا مسئلہ سفارت کاری کے ذریعہ حل کرنے پر زور دیا ۔ انہوں نے کہا کہ وزیراعظم عمران خان سفارتی حل کی اہمیت پر زور دیتے رہے ہیں۔

وزیر خارجہ نے یورپی یونین کے نمائندے کو پاکستان کے اصولی موقف سے آگاہ کیا، شاہ محمود قریشی نے کہا کہ پاکستان کایہ اصولی موقف ہے کہ بات چیت اور سفارت کاری کے ذریعے تنازعات کے پرامن حل میں مدد مل سکتی ہے۔ 

 ترجمان دفتر خارجہ کے مطابق وزیر خارجہ نے کشیدگی میں کمی کے لیے نئے سرے سے بات چیت ، پائیدار مذاکراتی عمل اور مسلسل سفارت کاری کی ضرورت پر زور دیا ۔  وزیر خارجہ نے متعلقہ کثیر جہتی معاہدوں، بین الاقوامی قانون اور اقوام متحدہ کے چارٹر کے اصولوں کے مطابق تنازعہ کے پر امن حل کی اہمیت پربھی زور دیا ۔ 

نائب صدر یورپی کمیشن جوزف بوریل نے یوکرین صورتحال پر وزیر خارجہ کے ساتھ اپنا نقطہ نظر بیان کیا اور عالمی امن اور معیشت پر اس صورتحال کے اثرات کو اجاگر کیا ۔  یورپی کمیشن کے نائب صدرنے سفارتی حل تلاش کرنے کیلئے مسلسل کوششوں کی اہمیت کو تسلیم کیا اور وزیر خارجہ شاہ محمودقریشی کے ساتھ رابطے برقرار رکھنے پر اتفاق کیا۔