پشاور : جامع مسجد میں دھماکہ،57افراد جاں بحق، متعدد زخمی

جی این این کے مطابق واقعے کی اطلاع ملتے ہی پولیس اور ریسکیو موقع پر پہنچ گئے ،  پولیس نے علاقے کو گھیرے میں لیتے ہوئے امدادی کارروائیاں انجام دیں  ۔

ایس ایس پی آپریشنز کے مطابق یہ خود کش حملہ تھا ، خودکش حملہ آور نے پولیس پر فائرنگ کی اور مسجد میں داخل ہو گیا جس کے بعد وہ منبر تک پہنچ گیا جہاں اس نے خود کو دھماکے سے اڑا لیا۔

 ایس ایس پی آپریشن پشاور کے مطابق دہشت گردوں کی فائرنگ سے 1 پولیس اہل کار شہید، جبکہ دوسرا زخمی ہو گیا، پولیس ٹیم پر حملے کے بعد جامع مسجد میں دھماکا ہوا ہے۔

ترجمان لیڈی ریڈنگ ہسپتال کے مطابق دھماکے میں 57 سے زائد نمازی شہید ہوئے ہیں  جبکہ  194 زخمیوں کو لیڈی ریڈنگ اسپتال منتقل کیا جاچکا ہے جن میں سے 10 کی حالت تشویش ناک ہے۔  لیڈی ریڈنگ ہسپتال میں ایمرجنسی نافذ کردی گئی ہے ۔    ترجمان کاکہنا ہے کہ زخمیوں کی تعداد میں اضافے کا خدشہ  ہے ۔ ایل آر ایچ میں ریڈ الرٹ اضافی طبی عملے کو بلا یا گیا ہے۔ 

چئیرمین سینیٹ صادق سنجرانی نے  پشاور میں جامع مسجد میں دھماکے کی شدید مذمت  کرتے ہوئے  کہا کہ  اس طرح کی  بزدلانہ تخریبی کارروائیوں سے ملک کے امن کو نقصان پہنچانے کی ہر کوشش ناکام ہوگی ، دہشت گردوں کو اپنے مذموم مقاصد میں کامیاب نہیں ہونے دیں گے۔   انہوں نے دھماکے میں زخمی ہونے والوں کی جلد صحتیابی اور  جاں بحق  افراد کی بلند درجات کی دعا کی ۔