وزیراعظم، وزیراعلی ٰ خیبر پختونخواہ اور اپوزیشن رہنماؤں کی پشاور دھماکے کی مذمت 

تفصیلات کے مطابق وزیرِ اعظم عمران خان  نے پشاور دھماکے کی مذمت کرتے ہوئے زخمیوں کو فوری طبی امداد فراہم کرنے کی ہدایت کی اور ساتھ ہی واقعے کی رپورٹ طلب کر لی۔

چئیرمین سینیٹ صادق سنجرانی نے پشاور میں جامع مسجد میں دھماکے کی شدید مذمت  کرتے ہوئے  کہا کہ  اس طرح کی  بزدلانہ تخریبی کارروائیوں سے ملک کے امن کو نقصان پہنچانے کی ہر کوشش ناکام ہوگی ، دہشت گردوں کو اپنے مذموم مقاصد میں کامیاب نہیں ہونے دیں گے۔   انہوں نے دھماکے میں زخمی ہونے والوں کی جلد صحتیابی اور  جاں بحق  افراد کی بلند درجات کی دعا کی ۔ 

جمعیت علمائے اسلام ف اور اپوزیشن اتحاد پاکستان ڈیمو کریٹک موومنٹ (پی ڈی ایم) کے سربراہ مولانا فضل الرحمٰن نے کہا ہے کہ پشاور کی مسجد میں خود کش دھماکے کے نتیجے میں قیمتی جانوں کے ضیاع پر افسوس ہے۔ پی ڈی ایم کے سربراہ نے حکام سے مطالبہ کیا کہ واقعے کے زخمیوں کو فوری طور پر طبی امداد فراہم کی جائے۔ 

پشاور کے قصہ خوانی بازار کی جامع مسجد میں نمازِ جمعہ میں ہوئے خود کش دھماکے سے متعلق وفاقی وزیرِ داخلہ شیخ رشید کا کہنا ہے کہ اس دھماکے کا کوئی تھریٹ الرٹ بھی جاری نہیں ہوا تھا۔ انہوں نے کہا کہ یہ خودکش دھماکا سوچی سمجھی سازش کے تحت پاکستان کو غیر مستحکم کرنے کی کوشش ہے۔

شیخ رشید کا یہ بھی کہنا ہے کہ غیر ملکی قوتیں پاکستان کا امن تباہ کرنا چاہتی ہیں، چیف سیکریٹری اور آئی جی کے پی کے سے واقعے کی رپورٹ طلب کی ہے۔

اپوزیشن لیڈر شہباز شریف  نے واقعے پر افسوس کا اظہار کرتے ہوئے کہا کہ  پشاور میں دہشت گردی کے دل دہلا دینے والا واقعے میں کئی قیمتی جانیں ضائع ہوئیں، اس ظلم کی مذمت کے لیے الفاظ کافی نہیں، دہشت گردی اب بھی ہمارا سب سے بڑا قومی چیلنج ہے۔ اپوزیشن لیڈر شہباز شریف  نے  غمزدہ خاندانوں سے اظہار تعزیت  کیا۔ 

چئیرمین پاکستان پیپلز پارٹی بلاول بھٹو زرداری  نے    پشاور دہشتگردی کی مذمت اور لواحقین سے تعزیت   کرتے  ہوئے  کہاکہ دہشتگردوں نے معصوم نمازیوں کو نشانہ بنا کر انسانیت پر حملہ کیا، نیشنل ایکشن پلان پر حقیقی عملدرآمد نہ ہونا افسوسناک ہے ، حکومت دہشتگردی میں ملوث عناصر اور ان کے سہولتکاروں کو فوری گرفتار کرے۔

وزیرِ اعلیٰ خیبر پختون خوا محمود خان نے پشاور کے قصہ خوانی بازار میں واقع جامع مسجد کوچہ رسالدار میں دھماکے کی مذمت کی ہے۔ انہو ں نے آئی جی پولیس خیبر پختون خوا سے واقعے کی رپورٹ طلب کر لی، جبکہ ریسکیو اداروں اور انتظامیہ کو امدادی کارروائیوں میں تیزی لانے کی ہدایت کی ہے۔ وزیرِ اعلیٰ خیبر پختون خوا محمود خان نے اراکینِ صوبائی کابینہ کو امدادی کارروائیوں کی نگرانی کرنے کی ہدایت بھی کی ہے۔