آسٹریلوی لیجنڈ اسپنر شین وارن 52 سال کی عمر میں انتقال کرگئے

آسٹریلوی میڈیا کے مطابق آسٹریلوی لیجنڈ اسپنر شین وارن 52 سال کی عمر میں انتقال کرگئے ہیں۔

وارن کو کرکٹ کھیلنے والے عظیم ترین باؤلرز میں شمار کیا جاتا ہے، انہوں  نے اپنے دور میں  ٹیسٹ کرکٹ کے دوسرے سب سے زیادہ وکٹ لینے والے کھلاڑی کے طور پر ریٹائرمنٹ لی تھی۔

وارن کی مینیجمنٹ کمپنی کی جانب سے ایک مختصر بیان میں تصدیق کی گئی کہ وہ تھائی لینڈ کے کوہ ساموئی میں دل کا دورہ پڑنے سے انتقال کر گئے۔شین وارن کا انتقال حرکت قلب بند ہونے کی وجہ سے ہوا، میڈیکل ٹیم نے انہیں بچانے کی پوری کوشش کی لیکن وہ جانبر نہ ہوسکے۔ 

یاد رہے شین وارن نے 1992 سے 2007 تک آسٹریلیا کی نمائندگی کی اور 145 ٹیسٹ میں 708 وکٹیں حاصل کیں۔