کراچی : ٹرائلز کے دوران نوجوان باکسر جان کی بازی ہار گیا

ٹرائلز کے لئے آنے والا بدقسمت باکسر طاہر علی جان حریف باکسر کا پنچ گردن پر لگنے کے باعث رنگ میں گر پڑے، بروقت آکسیجن اور طبی امداد نہ ملنے کے باعث طاہر علی خان انتقال کر گیا۔

طاہر علی خان کو مقامی اسپتال لے جایا گیا جہاں ڈاکٹروں نے نوجوان باکسر کی موت کی تصدیق کر دی۔

باکسر طاہر علی جان آج سے پیپلز اسپورٹس کمپلیکس کے باکسنگ اسٹیڈیم میں شروع ہونے والے یوم پاکستان کراچی ڈویژن باکسنگ ٹورنامنٹ کے لئے ٹرائلز دے رہا تھا۔ 
یہ ٹرائلز ڈسٹرکٹ کیماڑی باکسنگ ایسوسی ایشن کے تحت بے نظیر شہید باکسنگ کلب کیماڑی میں ہو رہے تھے۔

بدقسمت 20 سالہ طاہر علی جان کا تعلق نادر بلوچ باکسنگ کلب فقیر کالونی سے تھا، باکسر طاہر 54 کلو گرام کی کیٹیگری کے لئے ٹرائلز دینے آیا تھا۔

ٹرائلز کے وقت پاکستان باکسنگ فیڈریشن کے نائب صدر اصغر بلوچ اور دیگر اعلیٰ حکام بھی موجود تھے۔

طاہر جان فرید کالونی اورنگی ٹاؤن نمبر 10 کا رہائشی تھا، مرحوم باکسر کو مرشد قبرستان مواچھ گوٹھ میں سپرد خاک کر دیا گیا۔

واضح رہے کہ چند ماہ قبل بھی بروقت طبی امداد نہ ملنے کے باعث ایک باکسر دوران مقابلہ جاں بحق ہو گیا تھا۔