موجودہ صورتحال کا حل  نئے الیکشن  ہیں : اسد عمر 

تفصیلا ت کے مطابق پی ٹی آئی کے سیکرٹری جنرل اسد عمر نے اسلام آباد میں میڈیا سے گفتگو کرتے ہوئے کہا کہ ہم نے منحرف ارکان کو نوٹس دیا ان کا جواب تسلی بخش نہیں تھا، انہوں نے فلور کراسنگ کی ہے، آرٹیکل 63اے کی تشریح کی پٹشن عدالت میں زیرسماعت ہے،  20 منحرف ارکان کے خلاف ریفرنس دائر کریں گے، ان کی تاحیات نااہلی ہوگی۔

سابق وفاقی وزیر کا کہنا ہے کہ کل وزیر اعظم نے مرکزی پارلیمانی بورڈ کا اجلاس بلایا ہے ، اگلے الیکشن کے اندر 89 دن رہتے ہیں، الیکشن کی تیاریاں شروع کردی ہیں۔ 

اسد عمر نے کہا کہ جمہوری نظام کو مضبوط کرنے کے لئے اصلاحات بہت ضروری ہیں ،باہر سے ملکی سیاست میں مداخلت ہورہی ہے ، پاکستان میں جمہوری نظام کو مستحکم کرنے کے لئے ووٹ میں امانت میں خیانت نہ ہو،  موجودہ صورتحال میں ہمیں آئین کے درس دیے جارہے ہیں، جبکہ ایاز صادق نے اجلاس میں اسپیکر کی غیرآئینی نشست سنبھالی ۔ 

ان کاکہنا تھا کہ کس آئین میں لکھا ہے کہ پیسوں سے وفاداری خرید سکتے ہیں؟ آئین کی تو پہلے ہی خریدوفروخت کے ذریعے دھجیاں اڑائیں جا چکی ہیں،اب پاکستان کی عوام کو فیصلہ کرنا ہے۔

انہوں نے  کہا کہ  میرے خیال میں نئے الیکشن ہی واحد حل ہیں ، فیصلہ اب سپریم کورٹ ہی کرے گی، امید ہے سپریم کورٹ ایسا فیصلہ کرے گی جس سے انتشار پھیلنے کا خطرہ نہ ہو اور جو جمہوریت ہم نے بڑی مشکل سے حاصل کی ہے اس یہ پٹری پر ہی رہے۔

اسد عمر نے کہا کہ ہمارا بیانیہ قوم نے مان لیا ہے،  سیاسی جماعتوں کو بھی اس سے اتفاق کرنا چاہیے وہ سیاسی جماعتیں جو پورے ملک کو بتاتے رہے ہیں کہ پی ٹی آئی کی مقبولیت ختم ہوگئی ہے، پی ٹی آئی کا ٹکٹ کوئی نہیں لے گا اب میدان میں آئیں، اور مقابلہ کریں اب میدان بھی حاضر ہے اور گھوڑا بھی، آئیں ہمارے ساتھ مقابلہ کریں، ڈر کیوں رہے ہیں۔