چیئرمین پیپلز پارٹی بلاول بھٹو کا کارکنوں سے خطاب

اپنے خطاب میں ان کا کہنا تھا کہ پورا ملک جشن منا رہا ہے کہ عمران خان کی حکومت چلی گئی ہے، عمران خان پاکستان کے معاشی بحران کے ذمہ دار ہیں، انہوں نے پاکستانی اداروں کونقصان پہنچایا۔

مجمع عام سے خطاب میں ان کا کہنا تھا کہ ذوالفقارعلی بھٹونے ملک کو آئین دیا، یہ آئین ذوالفقار علی بھٹو کی امانت ہے، ہم جمہوری لوگ ہیں،عوامی مارچ کے نتیجے میں عمران خان کی حکومت گئی،وزیر اعظم کو جمہوری طریقے سے نکالا۔

بلاول بھٹو نے کہا کہ عمران خان اپنی حکومت ختم ہونے پرجشن منا رہے ہیں، انہیں پتا بھی نہیں کہ ان کے ساتھ کیا ہوا ہے۔ انہوں نے کہا کہ عمران خان تحریک عدم اعتماد سے بھاگ گئے ہیں، اور جاتے جاتے آئین کو توڑ گئے ہیں۔

بلاول بھٹو نے کہا کہ ہمیں انتخابی اصلاحات سے روکا گیا ہے، انتخابی اصلاحات کے بغیر جو بھی الیکشن ہوتا ہے وہ متنازعہ ہوتا ہے، اگلے الیکشن میں عمران خان کو پھر سلیکٹڈ کہا جائے گا۔

نئے انتخابات کے حوالے سے بات کرتے ہوئے ان کا کہنا تھا کہ پیپلزپارٹی ہر وقت الیکشن کے لیے تیار ہے،2013 اور2018 کے انتخابات شفاف نہیں تھے مگرپھر بھی ہم نے مقابلہ کیا۔