وزیر اعظم عمران خان کے خلاف تحریک عدم اعتماد کامیاب ہوگئی

تفصیلات کے مطابق وزیر اعظم عمران خان کے خلاف عدم اعتماد کی تحریک کامیاب ہو گئی ہے۔

وزیر اعظم عمران خان کے خلاف 174 اراکین اسمبلی نے ووٹ ڈالے جس کے بعد وہ عدم اعتماد سے نکالے جانے والے پاکستان کے پہلے وزیر اعظم بن گئے ہیں۔

اس سے قبل اسپیکر قومی اسمبلی اسد قیصر اور ڈپٹی اسپیکر قاسم خان سوری وزیر اعظم عمران خان سے ملاقات کے بعد مستعفی ہو گئے۔

اسپیکر اسد قیصر نے اپنے استعفے کا اعلان کرتے ہوئے کہا کہ میرے پاس دھمکی آمیز مراسلہ پہنچ چکا ہے جس کے بعد میں نے اپنے عہدے سے استعفے کا فیصلہ کیا ہے۔

انہوں نے کہا کہ زمینی حقائق کے تحت میں نے فیصلہ کیا ہے، نئی دستاویزات دیکھنے کے بعد میں اسپیکر کے عہدے پر قائم نہیں رہ سکتا اور استعفیٰ دے رہا ہوں۔

اسپیکر اسد قیصر نے کہا کہ میرے لیے ملک سب سے پہلے ہے، انہوں نے کہا کہ دھمکی آمیز مراسلہ میرے پاس ہے، کوئی دیکھنا چاہے تو دیکھ سکتا ہے، یہ دستاویز چیف جسٹس کو بھی دکھائی جائے گی اور اس بیرونی سازش کے خلاف پاکستان کے ساتھ سب کو کھڑا ہونا چاہیے۔

ان کا کہنا تھا کہ میں 26 سال سے عمران خان کےساتھ رہا اور اسٹوڈنٹ لائف سے تحریک انصاف کا کارکن ہوں۔

اسد قیصر نے کہا کہ عمران خان نے ملک کی خودداری اور آزادی کے لیے ایک مؤقف اپنایا ہے اور وہ اس پر ڈٹ کر کھڑے ہیں۔

تحریک عدم اعتماد پر ووٹنگ کرانے سے انکار کرتے ہوئے اسپیکر اسد قیصر نے ایوان ایاز صادق کے حوالے کر دیا۔

ایاز صادق کی صدارت میں عدم اعتماد پر پارلیمنٹ اجلاس کی کارروائی آگے بڑھائی گئی، جبکہ کارروائی شروع ہوتے ہی تحریک انصاف کے ممبران اسمبلی ایوان سے واک آؤٹ کر گئے۔