منحرف اراکین اسمبلی کی تاحیات نا اہلی کی درخواست سماعت کے لیے مقرر

تفصیلات کے مطابق سپریم کورٹ نے پاکستان تحریک انصاف کے منحرف ممبران پارلیمنٹ کی تاحیات نا اہلی کی درخواست سماعت کے لیے مقرر کر دی ہے۔

پی ٹی آئی کے منحرف اراکین کی تاحیات نااہلی کی درخواست چیئرمین تحریک انصاف عمران خان نے جمع کروائی تھی۔

میڈیا رپورٹس کے مطابق چیف جسٹس آف پاکستان جسٹس عمرعطا بندیال نے درخواست پرسماعت کے لیے 5 رکنی لارجر بینچ تشکیل دے دیا ہے۔

بتایا گیا ہے کہ 5 رکنی لارجز بینچ میں چیف جسٹس عمرعطابندیال، جسٹس اعجازالاحسن، جسٹس مظہر عالم، جسٹس منیب اختر اور جسٹس جمال خان مندوخیل کے نام شامل ہیں۔

سپریم کورٹ کا لرجر بینچ سوموار کے روز سہ پہر ایک بجے عمران خان کی درخواست پر سماعت کرے گا جس میں سابق وزیر اعظم کی جگہ بابر اعوان عدالت میں پیش ہوں گے۔

واضح رہے کہ سابق وزیراعظم عمران خان کے خلاف تحریک عدم اعتماد پیش ہونے کے بعد تقریباً 20 سے زائد تحریک انصاف کے ممبران اسمبلی نے اپوزیشن کا ساتھ دینے کا اعلان کیا تھا۔

تحریک انصاف نے منحرف اراکین اسمبلی کی تاحیات نا اہلی کے لیے عدالت سے رجوع کیا تھا تا کہ عدالتی فیصلے میں منحرف اراکین اسمبلی نا اہل ہو جائیں اور عدم اعتماد کی ووٹنگ کا حصہ نہ بن سکیں۔

پاکستان تحریک انصاف کا مطالبہ ہے کہ منحرف اراکین کو تاحیات نا اہل کیا جائے جس پر عدالت نے تاحیات نا اہلی کی درخواست سماعت کے لیے مقرر کر لی ہے۔