صدرِ مملکت کی گورنر پنجاب کو عہدے پر کام جاری رکھنے کی ہدایت

سماجی رابطے کی ویب سائیٹ ٹوئیٹر پر صدر مملکت کی آفیشل ٹوئیٹر اکاؤنٹ سے جاری پیغام کے مطابق صدر پاکستان عارف علوی نے گورنر پنجاب کو ہدایت جاری کی ہے کہ وہ اپنے عہدے پر کام جاری رکھیں۔

صدر مملک کی ہدایت کے مطابق گورنر پنجاب برطرفی کی سمری پر فیصلہ ہونے تک اپنے فرائض انجام دیتے رہیں گے۔

صدرِ مملکت ڈاکٹر عارف علوی کی گورنر پنجاب عمر سرفراز چیمہ کو اپنے عہدے پر کام جاری رکھنے کی ہدایت

گورنر پنجاب برطرفی کی سمری پر فیصلہ ہونے تک اپنے فرائض انجام دیتے رہیں، صدر مملکت کی ہدایت

— The President of Pakistan (@PresOfPakistan) April 18, 2022

واضح رہے کہ گزشتہ روز وزیر اعظم شہباز شریف نے صوابدیدی اختیارات استعمال کرتے ہوئے گورنر پنجاب عمر سرفراز چیمہ کو عہدے سے ہٹانے کی سمری صدر مملکت کو بھیجی تھی۔

گورنر پنجاب عمر سرفراز چیمہ سے عہدے سے ہٹائے جانے پر سوال کیا گیا تو انہوں نے کہا کہ مجھے اس طرح سے نہیں ہٹایا جا سکتا۔

انہوں نے کہا کہ ابھی صرف سمری بھیجی گئی ہے، صدر مملکت کے پاس سمری پر دستخط کرنے کے لیے 15دن کا وقت ہوتا ہے۔

ان کا مزید کہنا تھا کہ وزیر اعظم کے پاس مجھے عہدے سے ہٹانے کا اختیار نہیں ہے، یہ اختیار صدر کے پاس ہوتا  ہے۔