بنگلہ دیش کے سابق کرکٹر مشرف حسین انتقال کر گئے

بنگلہ دیش کے سابق اسپنر باؤلر مشرف حسین  دماغ کے سرطان میں مبتلا تھے اور  ڈھاکہ کے یونائیٹڈ ہسپتال میں زیر علاج تھے ۔  سابق کھلاڑی کو  مارچ 2019 میں دماغ میں رسولی کی تشخیص ہوئی ،  ابتدائی علاج کے بعد مشرف کی طبیعت میں کچھ بحالی نظر آئی ، لیکن نومبر 2020ء میں یہ رسولی پھر سے بڑھنا شروع ہو گئی اور بالاخر مرض سے جنگ لڑتے وہ جان کی بازی ہار گئے ۔ 

5 ون ڈے انٹرنیشنل میچز میں بنگلہ دیش کی نمائندگی کرنے والے مشرف نے اپنے مختصر کیریئر میں 4 وکٹیں حاصل کیں البتہ ان کا فرسٹ کلاس کیریئر تقریباً 17 سال پر محیط تھا جس کے دوران انہوں نے 3 ہزار رنز بنانے کے علاوہ 300  سے زائد وکٹیں بھی حاصل کیں۔

خیال رہے کہ بنگلہ دیش کے صرف 7 کھلاڑی ایسے ہیں جنہوں نے یہ کارنامہ انجام دے رکھا ہے۔

انٹرنیشنل کیریئر میں مشرف حسین کا پہلا مقابلہ 2008ء میں جنوبی افریقہ کے خلاف چٹوگرام میں کھیلا گیا ون ڈے مقابلہ تھا۔ 

مشرف حسین کے کیریئر کی سب سے نمایاں جھلک 2013ء کے بنگلہ دیش پریمیئر لیگ فائنل میں ان کا مین آف دی میچ بننا تھا۔ جس میں انہوں نے ڈھاکا گلیڈی ایٹرز کی جانب سے کھیلتے ہوئے میچ میں 26 رنز دے کر 3 وکٹیں حاصل کی تھیں۔

ڈومیسٹک سرکٹ میں شاندار کارکردگی کی بدولت انہیں 2016ء میں ایک مرتبہ پھر ٹیم میں طلب کیا گیا، جب انہوں نے افغانستان اور انگلینڈ کے خلاف ون ڈے سیریز میں ایک، ایک میچ کھیلا ۔ 

انگلینڈ کے خلاف اکتوبر 2016ء میں میرپور میں ہونے والا ون ڈے ان کے کیریئر کا آخری انٹرنیشنل میچ تھا۔ 

انہوں نے 112 فرسٹ ڈویژن میچوں میں 392 وکٹیں بھی حاصل کیں۔ اس نے ’لسٹ اے‘ میں بھی 104 میچ کھیلے اور 120 وکٹیں حاصل کیں۔

مشرف اپنے طویل فرسٹ کلاس کیریئر میں وہ نیشنل کرکٹ لیگ اور ڈھاکا پریمیئر لیگ کے ایک نمایاں کھلاڑی تھے۔