عمران خان آج مینار پاکستان پر عوامی طاقت کا مظاہرہ کریں گے

تفصیلات کے مطابق سابق وزیر اعظم عمران خان آج رات 9 بجے مینار پاکستان میں عوامی طاقت کا مظاہرہ کریں گے. پنڈال میں کارکنوں کی جلسہ گاہ آمد جاری ہے۔ چئیرمین پی ٹی آئی  اور سابق وزیراعظم عمران خان کھلاڑیوں سے خطاب کریں گے۔

جلسے کے لیےایک سو بیس فٹ لمبا اور چالیس فٹ اونچا اسٹیج بھی لگ گیا۔ انتظامیہ کی جانب سے پنڈال میں شرکاء کیلئے پچاس ہزار کرسیاں لگانے کا دعوی کیا گیا ہے۔

جلسہ میں عمران خان کی تقریر دکھانے کیلئے پندرہ بڑی سکرین نصب کر دی گئیں ہیں۔25 لاوڈ اسپیکر، 900 روشنیوں کے ٹاور بھی نصب کئیے گئے ہیں۔

چئیرمین عمران خان کی آمد پر جلسہ گاہ میں پندرہ منٹ تک آتشبازی کی جائے گی۔جلسہ گاہ کے شرکاء میں 3 لاکھ جھنڈے بھی تقسیم کیے جائیں گے۔

گزشتہ روز ڈپٹی کمشنر لاہور نے چیئرمین پی ٹی آئی عمران خان کو ایک مراسلہ بھیجا تھا جس میں انہیں آگاہ کیا گیا تھا کہ لاہور جلسے کے دوران ان کے لیے سکیورٹی تھریٹ  ہے لہذا جلسے سے آن لائن خطاب کر لیں یا اگر بلٹ پروف گاڑی استعمال کریں تو اس کے شیشے نہ کھولیں۔

سکیورٹی تھریٹ کے پیش نظر وزیراعظم شہباز شریف نے وزارت داخلہ کو ہدایات جاری کی ہیں کہ چیئرمین تحریک انصاف عمران خان کی سکیورٹی کو فول پروف بنایا جائے۔