شاہ محمود قریشی نے عمران خان کے خلاف نئی سازش کا انکشاف کردیا

لاہور جلسے سے خطاب میں  شاہ محمود قریشی نے کہا کہ نئی سازش گھڑی جا رہی ہے عوام کی کچہری میں رکھنا چاہتا ہوں، الیکشن کمیشن میں ایک سازش گھڑی جا رہی ہے۔ تحریک انصاف وائس چیئرمین نے کہا کہ نئی سازش کے تحت یہ عمران خان کو نااہل اور تحریک انصاف پر پابندی لگانا چاہتے ہیں، تنہا عمران خان کو دیوار سے لگادیا گیا ہے سارا مافیا یکجا ہوگیا ہے۔ شاہ محمود قریشی نے کہا کہ فارن فنڈنگ کیس کے ذریعے سازش تیار کی جا رہی ہے، تحریک انصاف سے جتنے بھی سوال ہوئے جواب دیے گئے، سوال صرف پی ٹی آئی سے ہوتے ہیں کیا پی پی اور ن لیگ کو جواب نہیں دینا؟ انہوں نے کہا کہ ہم جواب دینے کے لیے تیار ہیں لیکن یکطرفہ کارروائی نہیں ہوسکتی۔

تحریک انصاف کے لاہور جلسے سے خطاب میں شیخ رشید نے کہا کہ میں نے خانہ کعبہ میں لوگوں کو عمران خان کے لیے روتے ہوئے دیکھا ہے۔ انہوں نے کہا کہ بلاول بھٹو اپنے باپ کو صدر بنوانے کے لیے لندن گیا ہوا ہے، یہ وہ آصف زرداری ہے جس نے اپنی بیوی کو قتل کر کے اس ملک کی سیاست پر قبضہ کیا، مرتضیٰ بھٹو کو مروایا۔ سابق وزیر داخلہ نے کہا کہ فضل الرحمان کا بیٹا وزیر مواصلات لگ گیا ہے، جس نے مسجد کا باتھ روم تک نہیں بنوایا، اس کو شہباز شریف نے وزیرمواصلات لگا دیا ہے، وہ اب پورے پاکستان کی سڑکیں بنوائے گا۔ اپنے خطاب میں شیخ رشید نے کہا کہ  اگر عمران خان کو کچھ ہوا تو پاکستان میں خانہ جنگی ہوگی، چٹان کی طرح عمران خان کے ساتھ کھڑا ہوں، خون کے آخری قطرے تک عمران خان کے ساتھ ہوں۔

ق لیگ کے رہنما مونس الٰہی نے اپنے خطاب میں کہا کہ عمران خان کل بھی ہمارا وزیراعظم تھا،آج بھی ہمارا وزیراعظم ہے اور آئندہ کل بھی ہمارا وزیراعظم رہے گا، جس دن ہم نے دیکھا کہ عمران خان کے تمام دشمن اکھٹے ہو گئے ہیں،اس دن ہم نے فیصلہ کیا کہ اب عمران خان کا ساتھ نہیں چھوڑنا،شکریہ عمران خان کہ آپ نے گجرات والوں پر اعتماد کیا۔ انہوں نے کہا کہ ایک نوٹنکی اس وقت وزیراعظم عمران خان کی سیٹ پر بیٹھا ہے،وہ انشااللہ کچھ دنوں کا مہمان ہے،اس کو ہٹا کر عمران خان کو دوبارہ وزیراعظم کی کرسی پر بٹھائیں گے۔ مونس الئہی نے کہا کہ شریفوں نے ایک کِرلی کو وزیراعلیٰ پنجاب کے لیے نامزد کیا ہے،یہ وہ کرلی ہے جس کو میک اپ کرنے کا بہت شوق ہے،تحریک انصاف کی خواتین ایم پی ایز سے کہتا ہوں کہ یہ کرلی وزیراعلیٰ کا حلف اٹھائے تو اسے میک اپ بیگ گفٹ کریں۔